“Нёман” пры добрай гульні прайграў мінскаму “Дынама”

|

Перамогу гасцям прынеслі трапныя ўдары бразільскіх легіянераў “Дынама”.


Гарадзенцы заслугоўвалі ў гэтай гульні як мінімум нічыі.

 

Пасля таго, як госці забілі хуткі гол у пачатку першага тайму (вызначыўся адзін з лепшых гульцоў беларускага чэмпіянату Рафаэль Ледэсма), “Нёман” прыціснуў гасцей да іх штрафной пляцоўкі.

У складзе гарадзенскай каманды асабліва вылучаліся крайнія паўабаронцы Аляксей Сучкоў і Павал Савіцкі.

 

Госці раз-пораз адказвалі вострымі контратакамі.

Так, у пачатку другоага тайма пасля памылкі гарадзенскіх абаронцаў сам на сам з брамнікам “Нёмана” выйшаў нападнік “Дынама” і зборнай Беларусі Леанід Ковель.

 

Сяргей Чэрнік, аднак, бліскуча ліквідаваў пагрозу.

 

Аднак супраць тэхнічнага ўдара-перакідвання ў выкананні бразільца Леанарда ў канцы другога тайма і ён быў бяссільны.

 

У гэты момант гарадзенцы гулялі ўжо ў меншасці.

 

Суддзя Алег Чарапнёў у досыць спрэчнай сітуацыі выдаліў нёманца Паўла Рыбака.

 

“Нёман” нават у меншасці меў шансы “размачыць” чужую браму.

 

Добры шанец на гэта меў Дзмітрый Кавалёнак, які выйшаў на замену.

>

На шляху пасланага ім мяча, аднак, стаў былы брамнік “Нёмана”, а цяпер дынамавец Аляксандр Суліма.

 

Пасля гэтай паразы “Нёман” адкаціўся на 8-е месца ў турнірнай табліцы.

 

Наступную сустрэчу нашая каманда згуляе 31 ліпеня ў гасцёх у “Мінска”.

 

24 ліпеня. “Нёман” – “Дынама”, Мінск 0:2

 

Фота Яраслава Ванюкевіча