Гродна атрымае чарговы гандлёвы цэнтр і згубіць помнік архітэктуры

|

На яго абарону сталі гродзенскія гісторыкі, якія яшчэ ў красавіку падпісаліся пад зваротам у Міністэрства культуры і да старшыні Гродзенскага аблвыканкама Сямёна Шапіры.

Асаблівых поспехаў іх захады не мелі, лёс помніка вырашаны.

 

Па словах намесніка дырэктара інвестара будаўніцтва ТАА “Табак-Інвест” Аляксандра Скубакова, якія прыводзіць “Гродзенская праўда”, забудоўшчык захавае знешні выгляд казармы “з элементамі ўнутранага інтэр’еру, які адпавядае той гістарычнай эпосе.

У “Табак-Інвесце” вельмі кваліфікаваныя дызайнеры, і яны прадугледзелі ўсе нюансы. У казарме размесціцца рэстарацыя, стылізаваная пад яе”.

 

Гродзенскія гісторыкі выказваюцца меньш аптымістычна.

 

Гісторык Андрэй Вашкевіч:

–Я быў у ліку 23 гісторыкаў, якія падпісалі зварот у Мінстэрства культуры з просьбай унесці будынак казармы ў спіс гісторыка-культурных каштоўнасцяў Рэспублікі Беларусь. Зварот быў вельмі канкрэтны, але адказу з міністэрства не было.

Ведаем, што пасля сур’ёзнага абмеркавання з гарадскімі ўладамі забудоўшчыкі нібыта збіраюцца захаваць знешні выгляд, але сцвярджэння, што будынак будзе захаваны, няма.

Хутчэй за ўсё яе знясуць, можа захаваюць кавалак сцяны, зробяць макет – існуе маса варыянтаў.

Хацелася б верыць у лепшае, але ўпэўненасці няма.


Сяргей Піваварчык, загадчык кафедры археалогіі ГрДзУ імя Янкі Купалы:

–Цалкам казарму яны не змогуць захаваць, яна як раз па цэнтры будоўлі, але частка будынку будзе ўпісана ў праект.

Я прысутнічаў на абмеркаванні лёсу казармы. Улады тады былі зацікаўленыя і ў тым, каб не згубіць інвестара, і каб захаваць кансенсус.

Тады нам прапанавалі выступаць у якасці кансультантаў.

Забудоўшчыкі паабяцалі замовіць праекціроўшчыкам змены, каб частку казармы захаваць. Тады ж “Грамадзянпраекту” яны замовілі макет.

Больш я не бачыў праекта, не ведаю, якія змены адбыліся.

З мая месяца ніхто да мяне не звяртаўся. Пра апошнія падзеі я даведаўся з газеты.


Гісторыкі збіраюцца зноў накіраваць ліст у Міністэрства культуры з патрабаваннем усё ж правесці паседжанне навукова-метадычнай рады, якая мусіць разгледзіць справу ўнясення будынку казармы ў спіс гісторыка-культурных каштоўнасцяў.

Аналагічны казарме вайсковы шпіталь па вул.Дзяржынскага мае статус помніка другой катэгорыі.

 

Новы гандлёвы цэнтр “Карона”, які размесціцца на плошчы больш за 20 тысяч квадратных метраў, створыць 700 працоўных месцаў.

“Карона” абяцае шырокі выбар харчовых тавараў, кулінарныя вырабы, бытавую  тэхніку. Тут жа размесцяцца кавярня і рэстарацыя.