У Беластоку 4 верасня пройдзе марш пратэсту супраць нацыяналізму

|

На працягу апошніх тыдняў па Беласточчыне пракацілася хваля акцыі супраць прадстаўнікоў нацыянальных меншасцяў.


На будынку сінагогі ў Орлі былі намаляваныя фашыстоўскія лозунгі (“Жыды ў газавую камеру”, “Польшча для палякаў” і інш.).

Затым хтосці ўламаўся і знішчыў маёмасць у Мусульманскім Цэнтры ў Беластоку.

 

У гміне Пуньск, дзе большасць жыхароў складаюць літоўцы, былі замаляваныя літоўскамоўныя назвы вёсак на двухмоўных шыльдах.

У Беластоку падпалілі дзьверы кватэры, дзе жыла польска-пакістанская сям’я.

 

На мінулым тыдні быў пашкоджаны помнік (на здымку зверху) у мястэчку Едвабнэ, які быў пастаўлены ў памяць пра замардаваных тут 70 год таму палякамі габрэяў. У вясковым гумне былі тады спаленыя каля 360 габрэяў.

 

Помнік быў усталяваны 10 год таму. Тагачасны прэзідэнт Польшчы Аляксандр Квасьнеўскі публічна папрасіў тады прабачэння ў габрэйскай супольнасці за здзейсненае ў 1941 г. злачынства.

>

На помніку з’явілася свастыка і надпіс “Не перапрашаем за Едвабнэ”, “Лёгка гарэлі”.

 

Марш пратэсту супраць такіх акцый, ініцыяваны шэрагам палітыкаў і грамадскіх рухаў, пройдзе сёння ў абед па цэнтральных вуліцах Беластока.

 

Падляскае ваяводства з’яўляецца адным з самых шматнацыянальных рэгіёнаў Польшчы. З даўніх часоў тут жывуць беларусы, украінцы, літоўцы, татары, габрэі.

 

Фота: Нашэ Място, Gazeta.pl. Bialystok