Спецыялісты з Славакіі і Чэхіі чытаюць лекцыі гродзенскім студэнтам

Спецыялісты з Славакіі і Чэхіі чытаюць лекцыі гродзенскім студэнтам

Як паведаміў “Твайму стылю” дэкан факультэта Сяргей Уладзіміравіч Данскіх, гаворка на занятках замежных выкладчыкаў пойдзе пра тое, як кіраваць турыстычным рэгіёнам, як падаваць яго на рынку, як развіваць гасцінічныя гаспадаркі, як з мінуса зрабіць плюс, як, нарэшце, змяніць “слабаразвіты рэгіён” на “экалагічна чысты”.

Еўрапейскія выкладчыкі завіталі ў ГрДзУ імя Янкі Купалы ў межах рэалізацыі міжнароднага праекта “Мадэрнізацыя і ўкараненне бізнес-адукацыйных праграм падрыхтоўкі спецыялістаў для турыстычнай галіны Рэспублікі Беларусь” (MIBET), які фінансуецца еўрапейскай праграмай TEMPUS IV.

Марыян Гучык і Лібена Яралімкава з групай іншых заходніх выкладчыкаў упершыню трапілі ў Гродзенскі ўніверсітэт у кастрычніку 2009 года, калі міжнародны праект толькі распачынаўся.

Сяргей Данскіх:

–          Марыян Гучык і Лібена Яралімкава – гэта спецыялісты, якія выбралі нас самі.

Ім вельмі спадабаліся Гродна і гродзенскія студэнты, яны знайшлі шмат паралеляў паміж Чэхіяй, Славакіяй і Беларуссю, а нас таксама задаволіў іх досвед працы з беларускімі студэнтамі, тое, што нашы праблемы ім зразумелыя, гэта яны ўжо праходзілі…

Каб ахапіць як мага больш студэнтаў, замежныя выкладчыкі праводзяць заняткі адразу для цэлых курсаў.

Лекцыі наведаюць студэнты 2,3 і 4 курса.

З першакурснікамі, якія толькі пачынаюць уваходзіць у тэму, Марыян Гучык і Лібена Яралімкава правядуць проста сустрэчу.

У праграме іх побыту ў Гродне – сустрэча з прадпрымальнікамі і прадстаўнікамі турыстычнага бізнесу, экскурсія ў Каробчыцы і на аўгустоўскі канал.

Сяргей Данскіх:

– Госці вельмі  імкнуцца трапіць у наш звярынец, хаця мы і казалі, што яго рэканструкцыя яшчэ не скончылася.

Заапарк па еўрапейскіх мерках – гэта вельмі перспектыўны турыстычны аб’ект.

Ён ідэальна падыходзіць для сямейнага адпачынку.

Патэнцыйны рынак наведвальнікаў заапарку – 100%. Таму горад з заапаркам мае вялікі турыстычны патэнцыял.

Праект MIBET, у межах якога заходнія выкладчыкі наведваюць Гродна, скончыцца ў лістападзе. Скарыстацца з яго змаглі рэгіянальныя ВНУ ў Гродне, Брэсце і Віцебску.

Лекцыі наступнага іншаземнага, расійскага, лектара студэнты факультэта “Турызм і сэрвіс” змогуць наведаць у межах наступнай міжнароднай праграмы ўжо ў кастрычніку.