У Гродне збяруцца даследчыкі роду Валовічаў

|

Навуковая канферэнцыя “Род Валовічаў у гісторыі і культуры ВКЛ (XV–XVII стст.)”  пройдзе на базе Гродзенскага ўніверсітэта імя Янкі Купалы 15-16 кастрычніка.


Беларускія даследчыкі прадставяць новыя факты з жыцця і дзейнасці прадстаўнікоў знакамітага рода, разгледзяць іх ролю ў палітычным жыцці Вялікага княства, абмяркуюць знойдзеныя дакументы па гісторыі Валовічаў, разгледзяць іканаграфію Валовічаў, звесткі пра род у беларуска-літоўскіх летапісах і кроніках.

Адным з пытанняў разгляду стане прадстаўленне рода Валовічаў турыстам: аб’ектаў і месцаў, якія звязаны з прадстаўнікамі рода на Гродзеншчыне.

 

Кандыдат гістарычных навук Віталь Галубовіч, адзін з арганізатараў:

–          Ініцыятарамі правядзення канферэнцыі сталі супрацоўнік інстытута гісторыі НАН Беларусі і Сяргей Амелька – выкладчык універсітэта імя Янкі Купалы.

Прысвяцілі яе роду Валовічаў, бо гэты род пакінуў заўважную спадчыну ў гісторыі Гродна, вельмі заўважны, уплывовы і мала ўведзены ў турыстычна-гістарычны кантэкст Беларусі.

Астафій Валовіч – адзін з найбольш уплывовых палітыкаў 16 стагоддзя, Яраш Валовіч – выключна адукаваны дыпламат,  50 гадоў жыцця якога захаваліся ў перапісцы, успамінах…

Захавалася сядзіба Валовічаў у Свяцку, некалькі будынкаў у горадзе звязаныя з гэтым родам.

 

У канферэнцыі возьмуць удзел навукоўцы Інстытута гісторыі НАН Беларусі, Нацыянальнага архіва, навукова-даследніцкага цэнтра электроннай дакументацыі, Акадэміі ўнутраных спраў, Полацкага дзяржуніверсітэта, Гродзенскіх ВНУ, гісторыка-археалагічнага музея і абласной навуковай бібліятэкі імя Я.Карскага.

Канферэнцыя адкрыецца ў 10 гадзін 15 кастрычніка ў Новым замку.

 

На фота: Герб роду Валовічаў