Хор беларускай духоўнай музыкі “Бацькаўшчына” адзначыць дваццацігоддзе канцэртам

|

Днямі вядомы ў Гродне самадзейны хор адзначыў дваццатую гадавіну пачатку сваёй творчай дзейнасці.

Першы выступ “Бацькаўшчыны” адбыўся на праваслаўнае Раство 1992 года. Тады харысты спявалі на Савецкай плошчы.

З тае пары беларускія духоўныя спевы ў выкананні “Бацькаўшчыны” гучалі ў храмах, сацыяльных установах і ўстановах культуры Беларусі, на фестывалях у Даніі, Літве, Польшчы, Украіне, Францыі.

Нязменнай кіраўнічкай хора застаецца Вера Васільеўна Кунцэвіч.

У канцэрце 14 студзення возьмуць удзел хор хлопчыкаў і юнакоў “Светач” СШ№3 імя В.Вусава і народны ансамбль “Зарачанскія крынічкі” (в.Зарачанка), мастацкім кіраўніком якіх таксама з’яўляецца Вера Кунцэвіч.

Павіншуе “Бацькаўшчыну” з юбілеем і заспявае калядкі і хор польскай песні “Głos znad Niemna”.

Пачатак канцэрта ў гродзенскай кірсе ў 17 гадзін.

 

Калядныя спевы прагучаць яшчэ на двух канцэртах у Гродне.

15 студзеня канцэрт найпрыгажэйшых калядак свету ў выкананні хора “Sursum corda” пад кіраўніцтвам Алены Саковіч і ансамбля “ART-Azart” пад кіраўніцтвам Таццяны Пясецкай адбудзецца пасля імшы на дванаццаць гадзін у Фарным касцёле.

У 16 гадзін пачнецца калядны канцэрт семінарыйнага гурта  “Ave” ў СШ№20 для парафіян парафіі Маці Божай Вострабрамскай.

 

На здымку: Спявае “Бацькаўшчына”

Здымак Хрысціны Марчук