Фотаконкурс “Пацалунак па-беларуску”

|

Да Дня святога Валянціна, сімвалам якога з’яўляецца пацалунак, Беларуская Асацыяцыя клубаў ЮНЭСКА  і Творчы Саюз “Фотамастацтва” ладзяць юнацкі фотаконкурс, удзельнікам якога прапануецца раскрыць тэму кахання праз пацалунак.


Па ўмовах конкурса фотаздымкі ўдзельнікаў павінны адлюстроўваць беларускія рэаліі, якія адсылаюць да нацыянальных традыцый, асаблівасцей культуры, менталітэту, мыслення.
Да ўдзелу дапускаюцца аматарскія фатаграфіі партрэтнага жанру, вясельныя і жанравыя. Тэма кахання можа быць раскрытая ў розных аспектах: каханне да дзяўчыны/хлопца, любоў да маці, любоў да радзімы і г.д.

Марыя Троцкая, куратар конкурсу:
Фотаконкурс праводзіцца ў межах праграмы “Культура свету” грамадскага аб’яднання “Беларуская Асацыяцыя клубаў ЮНЭСКА”. Я навучаюся на спецыяльнасці “Культуралогія” , і мне заўсёды цікава было даследаваць нацыянальную культуру, нацыянальны каларыт.
Цікава, як моладзь адгукнецца, наколькі сур’ёзна паставіцца да нашай ідэі.
Абвесткі пра конкурс з’явіліся некалькі дзён таму, і ўжо ёсць каля дзесяці цікавых фотаздымкаў.
Ёсць здымкі ў метро, ёсць вясковыя – беларускі каларыт кожны аўтар разумее па-свойму.

Арганізатары конкурса спадзяюцца, што удзел у ім падштурхне моладзь да асэнсавання сваёй нацыянальнай культуры.
Работы на конкурс прымаюцца да 10 лютага.
Пасля падсумавання лепшыя работы будуць змешчаныя на выставе, пераможцы атрымаюць узнагароды.
У наступным годзе, кажа Марыя Троцкая, ёсць планы зрабіць аналагічны конкурс, але ўжо сярод прафесійных фатографаў.

Палажэнне аб фотаконкурсе “Пацалунак па-беларуску” – у дадатку.

Здымак з архіву “Твайго стылю”