Дом купца Мураўёва стаў намінантам на атрыманне антыпрэміі фестывалю AD.NAK

|

Гэты надпіс робіць здымак вартым антыпрэміі “Каша сувораўская” фестывалю беларускамоўнай рэкламы AD.NAK. Намінацыя збірае найгоршыя прыклады рэкламы, што скажаюць беларускую гісторыю ці сучаснасць. У гэтую намінацыю прымаюцца работы, якія ментальна ці ідэйна супярэчаць беларускай культуры і традыцыі. Удзельнікам можа стаць любы, хто заўважыць супярэчнасць у рэкламе.

 

“Менавіта ж за пралітую беларускую кроў Кацярына ІІ «пожаловала в вечное и потомственное владение» Сувораву Кобрынскую воласць з 13.279 душамі сялян – за разбіты пад Крупчыцамі корпус паўстанцаў Серакоўскага. Увесь ягоны ўклад у беларускую гісторыю – кроў нашых продкаў. Вось за такое стаўленне да беларускай гісторыі фестываль AD.NAK! зладзіў адмысловую антыпрэмію – “Каша сувораўская”, падаваць працы ў гэту намінацыю можа кожны,” – пішуць арганізатары конкурса на старонцы УКантакце.

 

Прыём работ на ўдзел у Трэцім фестывалі беларускамоўнай рэкламы і камунікацыі AD.NAK! заканчваецца 11 чэрвеня. Аргкамітэт фестывалю нагадвае, што ўдзел у фестывалі БЯСПЛАТНЫ, таму кожны, каму цікавая беларускамоўная рэклама, можа паспрабаваць свае сілы і падаць свае работы.

 

Сёлета конкурсная праграма фестывалю складаецца з 11 намінацыяў і 7 конкурсаў. Намінацыі разлічаныя на прафесіяналаў у рэкламнай сферы.

Сярод намінацый вылучаецца Антыпрэмія “Каша сувораўская”, дзе ўдзельнікам можа стаць любы, хто заўважыць супярэчнасць у рэкламе.

Ужо трэці год запар ладзіцца конкурс канцэптаў, якія не знайшлі практычнай рэалізацыі. Супольна з арганізатарамі бізнэс-гульні BigIn ладзіцца конкурс “Alma Матуля”, разлічаны на студэнцкую аўдыторыю. Ім прапануецца стварыць канцэпцыю прасоўвання брэнду свайго ўніверсітэта з выкарыстаннем сучасных сродкаў камунікацыі. Конкурс падтрымалі Бізнэс-школа ІПМ і партал RABOTA.TUT.BY.

Людзі, што любяць беларускую мову, могуць узяць удзел у конкурсе “Убач сваю мову”. У ім неабходна стварыць постар альбо серыю постараў фармату А3, у якіх будуць прадэманстраваныя выгады выкарыстання беларускай мовы ў штодзённым жыцці.

Супольна з фотастудыяй ZНЯТА Studio ладзіцца конкурс рэкламнага фотаздымка. Сёлета ён ладзіцца ў чатырох паднамінацыях: “СМАЧНА”, “ПРЫГАЖОСЦЬ”, “РОДНЫ КУТ”, “ІМІДЖ AD.NAK!”.

Самы еўрапейскі беларускі мабільны аператар velcom падтрымаў конкурс “Еўропа ўнутры Беларусі”. Удзельнікі конкурсу павінныя даслаць у любой зручнай для іх форме ідэю, якая б паказала Беларусь як еўрапейскую краіну.

Мыльны брэнд KARALI заснаваў конкурс “У мыле сэнс” на найлепшую назву і запакоўку для мыла. Конкурс праводзіцца ў дзвюх намінацыях: гатунак мыла для мужчын і гатунак мыла, які адлюстроўвае значны культурны альбо гістарычны феномен.

А для конкурсу пераагучвання сёлета выстаўлены ролік брэнду Jim Beam. На сайце Фестывалю AD.NAK! можна спампаваць відэадарожку, на якую неабходна накласці запісаны беларускі тэкст.

 

Ва ўсіх конкурсах і намінацыях пераможцаў чакаюць дыпломы і каштоўныя прызы ад партнёраў фестывалю.

 

Кульмінацыяй Фестывалю стане Вялікі фестывальны дзень, які пройдзе 5 ліпеня. Адукацыйная праграма Фестывалю будзе складацца з серыі майстар-класаў беларускіх і замежных прафесіяналаў у галіне рэкламы, а завершыцца дзень цырымоніяй узнагароджання пераможцаў.

Па дадатковую інфармацыю звяртайцеся ў аргкамітэт Фестывалю праз тэл.: +375 29 177-0121, 29 755-1434, +375 25 978-9787 альбо e-mail: adnak@budzma.org.