Развіццё турыстычнага бізнесу на Гарадзеншчыне падтрымае ПРААН

|

Праект “Мясцовае прадпрымальніцтва і эканамічнае развіццё”  рэалізуецца на грошы Агенцтва ЗША па міжнародным развіцці (USAID).

Гэты праект стане самым маштабным за 20 гадоў працы  ПРААН у Беларусі і накіраваны на Брэсцкую і Гродзенскую вобласці.

Да лютага 2015 года ў стварэнне ўмоваў для рэалізацыі мясцовых ініцыятыў у сферы экатурысцкага малога і сярэдняга бізнесу будзе ўкладзена 1 мільён 946 тысяч даляраў.

 

На першым этапе на конкурснай аснове абіраюцца тэрыторыі, на якіх пойдзе далейшая праца ў межах праекта. У Гродзенскай вобласці такіх тэрыторый (турыстычных дэстынацый) будзе да васьмі.

 

З сённяшняга дня пачаліся семінары, на якіх кансультанты дапамагаюць прэтэндэнтам вызначыцца з выбарам дэстынацый і правільна аформіць дакументы.

4 снежня семінар праходзіць на базе аграсядзібы “Верас”, 5 снежня – на базе тэніснага клуба ў Лідзе, 6 – на конна-спартыўнай базе “Гіппіка”.

 

Каардынатар праекта па Гродзенскай вобласці Аляксандр Шухно распавёў:

 

– У кожным з трох семінараў будзе ўдзельнічаць па 30-35чалавек – з большай колькасцю людзей проста цяжка будзе працаваць. Такім чынам праз навучанне пройдзе больш за 90 прадстаўнікоў Гродзенскай вобласці.

 

Праграма выклікае вялікую цікаўнасць, бо адкрывае добрыя перспектывы. Гродзеншчына мае і спрыяльныя прыродныя ўмовы,  і шмат помнікаў гісторыі, культуры, цікавыя аб’екты агратурызму.

 

-І што далей?

 

– Праект разлічаны на 2,5-3 гады.

Спачатку неабходна вызначыць у Гродзенскай вобласці да 8 найбольш перспектыўных тэрыторый. Гэта могуць быць як тэрыторыі ў межах аднаго пасялковага савета, так і  аб’ядноўваць некалькі адміністратыўных раёнаў. Аўтары праекта павінны прадставіць, як яны бачаць развіццё абранай дэстынацыі з пункту гледжання турызму. Мы дапамагаем ім кансультацыямі.

 

Праект заснаваны на аснове дзяржаўнага і прыватнага партнёрства

Чым больш партнёраў-суб’ектаў, тым лепш. Аб’яднаўшы намаганні яны змогуць такім чынам не толькі развіць сваю ўласную, напрыклад, аграсядзібу, але і турыстычную інфраструктуру ўсёй тэрыторыі.

 

Затым будуць абраныя дэстынацыі, з якімі будзем працаваць далей, а эксперты прапішуць стратэгіі развіцця праекта, у тым ліку з пункту гледжання сусветнага досведу.

 

А ўжо ў 2013 годзе будзе абвешчаны наступны конкурс – конкурс фінансавай падтрымкі. У ім змогуць удзельнічаць суб’екты, якія зарэгістраваныя на тэрыторыі абраных дэстынацый.

 

 

Ці змогуць удзельнічаць у праекце тыя, хто зараз не здолеў трапіць на семінары?

 

Далучыцца можна будзе на любым этапе. І тыя, хто ў бліжэйшыя дні будзе ўдзельнічаць у семінарах, і тыя, хто даведаецца пра праграму пазьней, змогуць атрымаць дадатковыя кансультацыі і ў органах мясцовай улады, і ў мяне як рэгіянальнага каардынатара.

 

Да лютага 2015 года ў стварэнне ўмоваў для рэалізацыі мясцовых ініцыятыў у сферы экатурысцкага малога і сярэдняга бізнесу на тэрыторыі Брэсцкай і Гродзенскай абласцей будзе ўкладзена 1 мільён 946 тысяч даляраў.

 

На Гарадзеншчыне перспектыўнымі лічацца Шчучынскі раён з аграсядзібамі, музеямі, Ліпічанскай пушчай; Аўгустоўскі канал з прылеглай тэрыторыяй, Слонімскі раён, Налібоцкая пушча, Наваградак-Карэлічы.

 

Электронная форма заяўкі і палажэнне можна спампаваць на сайце ПРААН у Беларусі
(http://undp.by/ru/undp/news/belarus/26-11-2012-n1.html), а папяровыя бланкі атрымаць у каардынатара праекта ў Гродне Аляксандра Шухно: +375 29 266 40 20, e-mail: aliaksandr.shukhno@undp.by.