Беларуская чыгунка ўводзіць новыя правілы
Квіткі на цягнікі з ненумараванымі месцамі (былыя электрычкі і дызелі) цяпер дзейнічаюць толькі да 2 гадзін наступных сутак пасля пазначанай даты паездкі.
Толькі ў гэты тэрмін можна праехаць туды і ў адваротны бок па пазначаным у квітку маршруце. Раней квіток на адваротную паездку дзейнічаў цягам двух сутак. Гэтым з задавальненнем карысталіся ашчадныя дачнікі: некаторыя пры адсутнасці кантралёраў паспявалі скарыстацца адваротным квітком двойчы.
Падаражэлі месячныя абанементныя квіткі “на прад’яўляльніка” і “імянны ільготны”. Цяпер кошты разлічваюцца зыходзячы з 18 паездак “туды” і 18 – “назад” (раней – па 17 паездак для квітка “на прад’яўляльніка” і 8 паездак – для “імяннога ільготнага”).
Даражэюць і месячныя абанементныя квіткі “выходнага дня”.
Квіткі на цягнікі гарадскіх ліній цяпер можна набыць толькі ў касах, размешчаных па маршруце цягніка. Для гэтага віду цягнікоў уведзеныя новыя віды праяздных: абанемент на дэкаду, месяц, 2 месяцы, на тэрмін да 1 года.
Іх уладальнік мае права выкарыстоўваць абанемент і ў цягніках рэгіянальных ліній эканом-класа ў межах пазначанага тарыфнага пояса.
Беларуская чыгунка больш не робіць зніжкі для бацькоў з дзецьмі і арганізаваных груп навучэнцаў (раней яны дзейнічалі ў перыяд з 1 кастрычніка да 30 красавіка). Гэта тлумачыцца стратнасцю перавозак пасажыраў па тэрыторыі Беларусі.
Паводле новых правіл, забараняецца паліць ва ўсіх цягніках акрамя міжнародных.
Паводле rw.by
Здымак gs.by