Гродзенская ДАІ правядзе дзіцячую фотасесію і разыграе прызы
12 жніўня на вуліцы Гродна выедзе патрульны аўтамабіль ДАІ з бартавым нумарам “555”.
Супрацоўнікі Дзяржаўтаінспекцыі будуць звяртаць увагу на аўтамашыны, дзе сярод пасажыраў – дзеці.
Такое аўто спыняць.
Калі дзеці-пасажыры перавозяцца паводле правіл (у спецыяльных дзіцячых крэслах альбо прышпіленыя рамнямі бяспекі), іх бацькам прапануюць запоўніць спецыяльную анкету.
Анкеты змогуць запоўніць таксама бацькі, якія разам з дзецьмі будуць па правілах пераходзіць дарогу.
Акцыя працягнецца да 14 жніўня.
Адзначаныя ДАІ дзеці атрымаюць магчымасць паўдзельнічаць у фотасесіі, а іх здымкі будуць размешчаныя на бігбордах, што напярэдадні новага навучальнага года з’явяцца на асноўных магістралях Гродзенскай вобласці.
50 бігбордаў, на кожным з якіх фотаздымак аднаго з сустрэтых у часе акцыі дзяцей законапаслухмяных кіроўцаў, ДАІ вырабіць сумесна з “Белджяржстрахам”.
Тэкст для ўсіх плакатаў аднолькавы:”Внимание – дети! Включи ближний свет фар”.
Фатаграфаваць дзяцей будуць не адразу: дадуць магчымасць падрыхтавацца і прапануюць падыйсці на фотасесію ў вызначаны час.
З 19 да 23 жніўня ў часе акцыі “Дзіця – галоўны пасажыр!” кіроўцы, якія перавозяць дзяцей ў аўтакрэслах, змогуць удзельнічаць у розыгрышы відэарэгістратара.
Яшчэ адну акцыю – “Гатоўнасць №1”, ДАІ правядзе разам з “Радыё “Гродна”.
Каб атрымаць падарункі (галоўны – дзіцячае аўтакрэсла), трэба ўключыць бліжняе святло фар і трапіць на вочы супрацоўнікам ДАІ.
Паводле http://gaigrodno.by