“Без границ” ад “Социум”: для аматараў хэві-метала і олдскула
Ужо пасля першага праслухоўвання становіцца зразумелым, што альбом цалкам адпавядае сваёй назве. Музыкі не заганялі сябе ні ў якія рамкі: ні жанравыя, ні моўныя, ні вакальныя. Альбом – сумесь року, хэві-металу, троху рэгі і іншых альтэрнатыўных гатункаў. А вось тэксты (прынамсі тыя, што на рускай і беларускай мовах), пераважна “металёвыя” па сваім духу. Адна песня, дарэчы, па-польску.
У гурта ёсць як жаночы, так і мужчынскі вакалы, пры чым абодва галасы моцныя і чыстыя. Асабліва хочацца выдзеліць бэкі. Яны атрымаліся даволі прафесійна, і дадаюць песням асаблівы драйв і эстэтычную асалоду. Іх не зашмат і не замала: акурат столькі, колькі трэба.
На ангельскай мове дзве песні. Трэба адзначыць, что для гарадзенскай сцэны ў іх даволі нядрэннае вымаўленне. Ужо пры першым праслухванні адной з іх – “I’m on Fire”, узнікае уражанне, быццам “Социум” проста выканаў кавер нейкага заходняга гіта. Але аўтарамі песні з’яўляюцца самі гарадзенскія музыкі.
Песню “Шукай мяне рэха” ўвогуле хочацца паставіць на паўтор і слухаць гадзінамі. Частка песні – ці то кавер на знакамітую “Дзеці чорнага горада” гурта “Новае неба”, ці то проста яшчэ адна песня на выдатны верш паэткі Таццяны Сапач. Поўны экспрэсіі вакал Інэсы Сазон у чымсці нават нагадвае колішнія спевы Касі Камоцкай пачатку 90-х.
Дарэчы, яшчэ адна беларускамоўная песня – “Падай” – таксама напісана на верш адной з цікавейшых сучасных беларускіх паэтак Леры Сом.
Як падаецца, у некаторых песнях рытм-гітара занадта моцна выведзена на пярэдні план, і зусім не чуваць бас-гітары. Гэта, напэўна, адзін з нешматлікіх мінусаў альбома. Можна яшчэ згадаць невялікія ўстаўкі простых манатонных рытмаў, але яны хутка змяняюцца чым-небудзь “драйвовым” альбо проста цікавым. Астатняе зроблена на даволі высокім узроўні, асабліва калі разглядаць альбом на фоне мясцовай рок-сцэны.
Альбом прыйдзецца па душы аматарам хэві-метала і олдскула. Астатнія знойдуць для сабе толькі адзін-два трэкі.
За недахоп у запісе бас-гітары і манатонныя рытмы ў некаторых песнях стаўлю адзнаку 8,5/10.
Гурт: Социум
Альбом: Без границ
Год: 2013
Гатунак: рок, хэві-метал
Ацэнка: 8,5/10 (калі вы аматар хэві)
| Паслухаць альбом можна на сайце гурта або УКантакце | ||