“Нёман” пакінулі адразу чатыры футбалісты
Калі Салавей і Рахманаў толькі зрэдку сёлета з’яўляліся на полі, то Рэкіш і Весялінаў былі аднымі з лідэраў клуба.
Рашэнне развітацца з імі звязанае з няўдалым выступам каманды ў сёлетнім чэмпіянаце і крытычнай фінансавай сітуацыяй у клубе.
Сербскі паўабаронца Ўладзімір Весялінаў (на здымку ніжэй) прыехаў у Гродна ў пачатку 2012 г. За час выступаў за “Нёман” згуляў у складзе каманды 70 афіцыйных гульняў, у якіх забіў 5 галоў.
Дзмітрый Рэкіш (на здымку ніжэй) у маладыя гады падаваў вялікія надзеі, быў лідэрам юнацкіх зборных Беларусі.
Аднак у “дарослым” футболе так цалкам і не даказаў свой талент: часта змяняў клубы, гуляў нестабільна.
Вось і ў складзе “Нёмана”, куды ён прыходзіў двойчы (агулам згуляў 39 гульняў і забіў 5 галоў) мог выдаць выдатную гульню, але часцей нічым на полі не вылучаўся.
Арцём Салавей (на здымку вышэй) таксама быў на прыкмеце ў трэнераў нацыянальнай зборнай Беларусі пасля ўдалых выступаў за маладзёжную зборную, вынікова гуляў за жодзінскае “Тарпеда-БелАЗ”.
У “Нёмане”, аднак, таксама сябе не праявіў: 19 гульняў і аніводнага гола за год.
Абаронца Арцём Рахманаў (на здымку вышэй) згуляў яшчэ менш – усяго 9 сустрэч.
Месца гэтай чацьвёркі займуць гульцы “дубля” гарадзенскай каманды, дзе за апошнія гады падгадавалася чарговая партыя здольных маладых гульцоў.
Менавіта на мясцовых выхаванцаў будзе вымушана зрабіць у наступным сезоне стаўку кіраўніцтва “Нёмана” (цяперашняе альбо новае), бо разлічваць на істотнае паляпшэнне сітуацыі з фінансаваннем каманды і прыцягненне за кошт гэтага моцных гульцоў з іншых гарадоў і краін пакуль не выпадае.
Фота: fcneman.by