Не толькі Галерэя Бяла. Што яшчэ варта паглядзець у Беластоку?
Беластоцкі тэатр лялек
У сваіх пастановах тэатр выкарыстоўвае шматлікія лялечныя і візуальныя тэхнікі, у рэпертуары ёсць спектаклі для дзяцей і дарослых.
Зараз у тэатры можна паглядзець “Пінокіа” ці “Чырвоны капялюшык”.
Непаўторная атракцыя: цягам гадзіны пасля кожнага спектакля можна наведваць таксама “Падвал лялек”, у якім сабраныя ўсе лялькі, касцюмы, элементы тэатральных дэкарацыі, якія выкарыстоўваліся ў старых пастаноўках.
Квіткі: 9-25 PLN
Адрас: Каліноўскага, 1
Опера і філармонія Падляшская
Найбольшая культурная ўстанова ў паўночна-усходняй Польшчы. Гэта не толькі музыка, опера, тэатр, але таксама выставачная зала, рок ці джаз-канцэрты і прыгожая, сучасная архітэктура.
Квіткі: 16-120 PLN
Адрас: Адэская, 1
Мурал “Дзяўчынка з лейкай”
Мурал знаходзіцца на вуліцы Пілсудскага 11/4. Намаляваны ў 2013 годзе мастачкай Натялляй Рак. Нядаўна ён стаў прадметам публічнай дыскусіі, бо камяніца, на якой знаходзіцца, выстаўленая на продаж. Пакуль малюнак застаецца, але лепш спяшацца яго пабачыць. Дарэчы, нядаўна ў Беластоку намалявалі другі падобны мурал – “Хлопчыкз вудай” (вул. Антанюкоўская, 42)
Мастацкая галерэя “Арсенал”
Галерэя прэзентуе сучаснае мастацтва, польскае і еўрапейскае: выяўленчае мастацтва, фатаграфію, скульптуру, перформанс і іншыя гатункі, а таксама арганізуе канцэрты і паказы фільмаў.
Квіткі: льготны: 4 PLN, нармальны – 8 PLN. Чацвер – уваход вольны
Адрас: ал. Міцкевіча, 2, Электрычная, 13
Час працы: аўторак-нядзеля, 10.00-18.00
Палац Браніцкіх разам з паркам
Нават калі вы не вельмі любіце глядзець помнікі архітэктуры, у гэтым месцы вам трэба дакладна пабываць. Палац Браніцкіх разам з паркам – сама прыгожая каштоўнасць Беластока. Калісьці яго называлі нават “Польскім Версалем”. Палац і сады навакол захавалі рысы стылю барока.
Час працы: 6.00-24.00
Ці не кожны гарадзенец ведае, што Заменгоф жыў і працаваў у нашым горадзе. Трэба аднак памятаць, большая частка яго жыцця звязана з Беластокам. У Гродне музея знакамітага лекара і стваральніка мовы эсперанта няма, а вось у нашых суседзяў – ёсць. Акрамя выставак – багатая культурная праграма і бібліятэка, у якой можна знайсці шмат літаратуры па тэме эсперанта. Раім наведваць.
Квіткі: 4,8 PLN
Адрас: Варшаўская, 19
Час працы: 10.00-17.00
Даўні фарны касцёл
Маленькі касцёл у стылі познага рэнесансу – самы стары мураваны будынак у Беластоку. Знаходзіцца ў суседстве нэагатычнай беластоцкай катэдры на плошчы Касцюшкі, таму ён не такі заўважны ў яе цені. Увагу прыцягваюць аздобленыя драўляныя дзверы і партал у стылі барока.
Рэстаран “Штука мяса”
Калі вы мясаед – не маглі патрапіць лепш. Вялікі выбар гамбургераў і стэйкаў, цікавы інтэр’ер і якасныя прадукты – гэта і ёсць рэстаран “Штука мяса”. Меню пастаянна мяняецца, рэстаран запрашае на сняданкі, абеды і вячэры, а таксама – на кулінарныя заняткі.
Адрас: Кракаўская, 1
Час працы: 9.00-22.00
Скейтпарк “Венглёва”
Калі вы катаецеся на скейце, роліках, BMW – абавязкова бярыце іх з сабой у час паездкі ў Беласток. Скейтпарк Венглёва – сапраўды крутое месца і да таго не так даўно яго рамантавалі.
Адрас: Венглёва, 8
Час працы: 17.00-20.00
Кавярня „Тарталіна”
Кавярня, з якой не захочацца выходзіць. Тут шырокі выбар выпечкі з фруктамі, гароднінай, салёных і салодкіх, а таксама смакавітых піражкоў. Тарты і смачная кава – гэта самая лепшая ідэя на кулінарны летні адпачынак у Беластоку.
Адрас: Кілінскага, 12
Час працы: 10.00-23.00
А што раіце пабачыць у Беластоку вы? Пішыце ў каментарыях пра свае любімыя месцы.