На будаўніцтва новага спорткомплекса вылучаны міліярд рублёў

|

Такія факты былі агучаныя ў час прамой лініі старшыні гарадзенскага гарвыканкама Барыса Казялкова з жыхарамі горада – паведамляе “Гродзенская праўда”.

 

“Твой стыль” звярнуўся па каментар да намесніка начальніка абласнога ўпраўлення па фізкультуры, спорту і турызму Алега Андрэйчыка:

 

– Выдаткаваны з абласнога бюджэту міліярд пойдзе сёлета на праектныя і, магчыма, пачатак будаўнічых работ. Канкрэтнага падрадчыка пакуль няма.

 

– Што будзе ўяўляць з сябе будучы спарткомплекс?

 

– Гэта будзе ўніверсальны комплекс, прызначаны найперш для гульнёвых каманд спорту.

 

Свае матчы змогуць праводзіць тут гандбалісты, баскетбалісты, валейбалісты.

 

Плануецца будаўніцтва трыбун на 3-5 тысяч месцаў.

 

Гэта дазволіць таксама праводзіць тут культурна-масавыя мерапрыемствы.

 

Хацелася б збудаваць таксама дадатковы трэніровачны зал, магчыма – тэнісныя корты, футбольнае поле.

 

– Пляцоўка пад будаўніцтва ўжо канчаткова зацверджаная?

 

– Не. Ёсць некалькі варыянтаў, але пляцоўка за царквой з’яўляецца пакуль асноўным.

 

Пра будаўніцтва новага спорткомплекса ў Гродне гаворка ідзе ўжо амаль 10 гадоў.

 

Пра планы пачаць будаўніцтва ў тым ці іншым месцы горада абвяшчалася ледзь не штогод, але грошай у бюджэце кожны раз не знаходзілася.

 

Спартыўныя комплексы для гульнёвых відаў спорту ў апошнія гады былі збудаваныя і актыўна выкарыстоўваюцца ў Магілёве і Брэсце.

 

Гарадзенскія ж каманды вымушаныя гуляць у цесных залях спарткомплекса “Вікторыя” на вул. Гагарына альбо ў вучылішчы алімпійскага рэзерву на вул. Паповіча.

 

На здымку: так выглядаў макет аднаго з праектаў спорткомплекса ў Гродне

 

Фота: Der Schatten