Гарадзенцы раскупілі амаль усе паштоўкі, зробленыя дзяцьмі-інвалідамі
Як распавяла Вольга Шульга, дырэктар Грамадскай дабрачыннай арганізацыі “Гродзенскі дзіцячы хоспіс”, акцыя арганізавана з удзелам выхаванцаў Гродзенскага карэкцыйнага цэнтра дзяцей-інвалідаў.
>
Дзеці падрыхтавалі адмысловыя велікодныя паштоўкі, якія цягам апошніх дзён прадаваліся ў Гроднажылбудзе, на Мясакамбінаце, у ФОКу па вул. Горкага, а таксама ў Алмі.
– Супрацоўнікі прадпрыемстваў прынялі актыўны удзел у акцыі, падкрэслівае Вольга Шульга, – амаль усе паштоўкі і падзелкі на велікодную тэматыку распрадаліся.
Выручаныя падчас акцыі сродкі будуць накіраваны на карысць дзяцей-інвалідаў.
Частка з іх пойдзе на арганізацыю святочных мерапрыемстваў да Дня дзіцяці.
Кіраўніцтва фізкультурна-аздараўленчага комплексу па вул. Горкага паабяцала зладзіць для дзяцей-інвалідаў свята на вадзе, прымеркаванае да Дня сям’і.
Гарадзенцы яшчэ могуць паспець далучыцца да акцыі і купіць паштоўкі, зробленыя рукамі дзяцей-інвалідаў, на велікодным кірмашы на Савецкай плошчы.
На фота: Паштоўкі, зробленыя выхаванцамі Гродзенскага карэкцыйнага цэнтра дзяцей-інвалідаў.
Фота аўтара