8 выпадкаў захворвання на Лайм-барэліёз зафіксавана ў Гродне
У мінулым годзе, паведамляе БелТА, 17,8% даследаваных кляшчэй у Беларусі былі інфікаваныя барэліямі, клешчавым энцэфалітам – 5,8%.
Сёлета падобнай статыстыкі пакуль няма.
За сакавік-май у медыцынскія ўстановы звярнуліся пацярпелыя ад іх укусаў 5837 беларусаў.
У Гродне сітуацыя не самая горшая.
Як паведаміў “Твайму стылю” энтамолаг Гродзенскага занальнага цэнтра гігіены і эпідэміялогіі, ад укусаў кляшчоў з пачатку года пацярпелі 336 гродзенцаў, сярод якіх на клешчавы энцэфаліт у гэтым годзе ніхто пакуль не захварэў.
Сярод захварэўшых сёлета ў Гродне на Лайм-барэліёз, частка людзей была інфікаваная яшчэ ў жніўні-верасні мінулага года, назіралася ў паліклініках па месцы жыхарства, і толькі вясной хвароба пачала праяўляцца.
Першы выпадак хваробы быў зарэгістраваны ў лютым.
Хвароба Лайма – самая распаўсюджаная з захворванняў, якія перадаюцца кляшчамі.
Раннія праявы – галаўны боль, жар, стома, высыпанні на скуры.
На ранніх стадыях паддаецца лячэнню.
Наколькі цяжкім будзе захворванне залежыць ад многіх фактараў: ступені інфікаванасці самога кляшча, імунітэту пацярпелага і таго, колькі часу клешч правёў, прысмактаўшыся на целе чалавека.
Дактары заклікаюць неадкладна звяртацца ў паліклініку тых, хто знайшоў на сабе кляшча, каб было магчыма своечасова вызначыць, ці з’яўляецца клешч носьбітам інфекцыі і ці нешта пагражае вашаму здароўю.
Калі развіваецца позняя стадыя альбо хранічная хвароба Лайма, яна можа прывесці да інваліднасці і нават смерці.