“Малады Фронт” заступіўся за Таццяну Касатую

|

Ліст з папярэджаннем супрацоўнікам Купалаўскага універсітэту, якія, на думку аўтараў звароту, з’яўляюцца адказнымі за адлічэнне аспіранткі кафедры славянскіх дзяржаў гістфаку, з’явіўся на сайце “Маладога фронту”.

 

І сама Таццяна, і грамадскія актывісты звязваюць рашэнне аб адлічэнні дзяўчыны з актыўнай грамадскай дзейнасцю дзяўчыны.

 

Аўтары ліста аднаўляюць паслядоўнасць падзеяў:


Таццяна тры гады адпрацавала малодшым навуковым супрацоўнікам Гродзенскага Гісторыка-археалагічнага музея. Пасля выбараў адміністрацыя музея (у асобе дырэктара Юрыя Кітуркі) папярэдзіла дзяўчыну, што пры любым парушэнні дысцыпліны яе звольняць. Паколькі парушэнняў так і не было, яна працавала да заканчэння кантракта, які так і не працягнулі.


Адначасова Таццяна была аспіранткай на кафедры славянскіх дзяржаваў Гістфаку ГрДУ, дзе працавала над тэмай “Дзейнасць евангельскіх хрысціян-баптыстаў у БССР. 1941-1991 гг.” (навуковы кіраўнік – Чарапіца В.М.).

 

Аднак раптоўна, восенню гэтага году Таццяна не праходзіць атэстацыі на кафедры. Універсітэцкая атэстацыйная камісія большасцю галасоў (рашучыя галасы належылі акурат Ярмусіку, Чарапіцу, Нечухрыну) паццвярджае выключэнне Таццяны.


І вось, у рэшце рэшт адмыслова створаная камісія па разглядзе апеляцыі аспіранткі, замацоўвае ўсе папярэднія рашэнні (тут трэба падзякаваць дэкану юрфаку Сільчанку, прарэктару Хацкевічу, і зноў жа загадчыку кафедры славянскіх дзяржаваў Чарапіцу).


Таццяна Касатая распавядае, што яшчэ месяц таму навуковы кіраўнік прапанаваў ёй, як занадта актыўнай у грамадскім і палітычным жыцці, сысці з аспірантуры самой, па ўласным жаданні альбо па стане здароўя, папярэдзіўшы, што ў адваротным выпадку атэстацыю яна не пройдзе. Дзяўчына рызыкнула, і ў выніку была выключана з аспірантуры на падставе невыканання плана.

 

Таццяна Касатая:

У плане ў мяне была пазначана праца над трэцяй главой. Я прадставіла свае навуковыя працы за апошні год, мае артыкулы па тэме, але ад мяне запатрабавалі тэкст главы.

 

Таццяна выказала нязгоду з рашэннем паседжання кафедры, папрасіла склікаць атэстацыйную камісію Савета факультэту.

 

Аспірантка прадставілі водгукі на свае працы за апошні год ад гродзенскіх, віцебскіх гісторыкаў, супрацоўнікаў Варшаўскага ўніверсітэту, Інстытута гісторыі НАН Беларусі.

 

Калегі напісалі водгукі на мае працы, да якіх былі прэтэнзіі ў майго навуковага кіраўніка, і гэта выклікала вельмі нервовую рэакцыю з яго боку.

Ён вінаваціў мяне ў тым, што я засумнівалася ў яго кампетэнцыі. Але я прадставіла гэтыя водгукі толькі для таго, каб пацвердзіць мае навуковыя магчымасці.


Рашэнне камісія прымала за зачыненымі дзвярыма. Таццяне паведамілі, што рашэнне аб яе адлічэнні з аспірантуры пакінутае ў сіле.

 

Таццяна Касатая:

Я па-ранейшаму не згодна. Хутчэй за ўсё буду пісаць скаргу ў Міністэрства адукацыі.


Фота з сайта http://zapraudu.info