Уладзімір Цэслер: ад Луўра – да «Крыгі»
Гаспадыня галерэі Марыля Мацко распавядае пра аўтара:
– Уладзімір Цэслер – легенда ў беларускім мастацтве. Не кожны мастак можа пахваліцца тым, што яго працы знаходзяцца ў Луўры. Цэслер перакрэсліў усе стандарты, што былі закладзены ў нас савецкай школай, яго асоба выйшла па-за межы нашага выхавання. Уладзімір нарадзіўся ў Слуцку, невялікім гарадку, які ператварыў для сябе ў прыгожую казку і песню. За кожнай вуліцай і кожным будынкам у сваім горадзе ён бачыць працяг нейкай іншай краіны: ці гэта Польшча, ці Брытанія, ці… Кітай.
Дадзены плакат для LEVI’S вісіць у музеі шэдэўраў рэкламы ў Луўры (Парыж); фота tut.by
«Муму» у горадзе Амстэрдаме (у суаўтарстве з М. Байрачным); фота tsesler.com
Уладзімір правёў за сваё жыццё больш за 30 выстаў. Ён працуе ў розных накірунках: графіка, жывапіс, скульптура, аб’ект, мастацкія акцыі, прамысловы дызайн, афармленне кніг, рэклама і інш.
Пра Цэслера распавялі гарадзенскія мастакі і выкладчыкі, на яго прэзентацыі атрымаўся нават невялікі дыялог. Кіраўнік Гарадзенскага Саюзу мастакоў Мікола Бандарчук сказаў наступнае:
– Дзякуючы такім хлопцам як Цэслер, беларускі плакат паднялі на сусветны ўзровень! Я памятаю праект Цэслера «металічныя яйкі». Гэта быў неардынарны ход. І студэнты, і выкладчыкі ехалі ў Мінск, каб паглядзець сапраўдны дызайнерскі праект… Падзякуем Цэслера за тое, што ён даў згоду зрабіць выставу ў Гродне. Нашым студэнтам, што вучацца ў сярэдніх спецыяльных і вышэйшых установах будзе вельмі цікава прыйсці і павучыцца таму, як думае і бачыць дызайнер вышэйшай пробы.
>
Сам Цэслер распавёў пра свае працы, пра школу беларускага дызайна, прывёў прыклады з жыцця. Выстава Уладзіміра Цэслера працягнецца да 18 сакавіка.
Фота аўтара