Летняя школа-экспедыцыя ў Жалудку
Навуковы цэнтр «Сэфер» быў створаны ў 1994 годзе з мэтай садзеяння навуковым даследванням у вобласці іўдаікі ды выкладання яўрэйскіх дысцыплін у ВНУ. Цэнтр аб’ядноўвае ўсіх, хто звязаны з даследаваннямі яўрэйскай цывілізацыі і аказвае падтрымку студэнтам, акадэмічным супрацоўнікам у вывучэнні розных аспектаў іўдаікі.
У дадзены момант «Сэфер» – гэта адна з найбуйнейшых арганізацый на постсавецкай прасторы, якая займаецца развіццем розных аспектаў габрэйскіх даследванняў, вывучэння спадчыны ды сучаснага стану габрэйскіх суполак. Сярод дзейнасці навуковага цэнтра асобным пунктам стаяць палявыя летнія школы-экспедыцыі. У гэтым годзе даследчыкі запрашаюцца ў Санкт-Пецярбург, Меджыбож, Бельцы (Малдова) ды ў Рыгу.
Што тычыцца палявой школы на тэрыторыі Гродзенскай вобласці, то яе праграма ўключае не толькі лекцыі вядучых спецыялістаў Расіі і Беларусі ў вобласці гісторыі яўрэяў Усходняй Еўропы, яўрэйскай этнаграфіі і эпіграфікі, традыцыйнай народнай культуры паліэтнічных рэгіёнаў, але і практычныя заняткі па зборы фальклорна-этнаграфічнага матэрыла (вусная гісторыя, этнакультурныя стэрэатыпы, міфалогія і штодзённасць). Таксама плануецца праца па апісанню яўрэйскіх могілак XVII-XIX ст. з расшыфроўкай каталагізацыяй эпітафій.
Школа адрасавана гісторыкам, этнографам, філолагам, культуролагам ды спецыялістам, навуковая праца якіх тым ці іншым чынма звязана з яўрэйскай культурай. Як зазначыла Ірына Кашталян (фота на застаўцы), каардынатар праекта «Беларускі архіў вуснай гісторыі»:
– Такія школы будуць вельмі карысны беларускім даследчыкам і маладым навукоўцам. Там заўсёды цікавая і насычаная праграма. Нам вельмі важна імкнуцца да разумення Беларусі як мульцікультурнай краіны, асабліва ў міжваенны перыяд.
Летняя школа ў Жалудку прадставіць слухачам магчымасць акунуцца ў свет яўрэйскага мястэчка і дакрануцца да яго багатай гісторыі. Экскурсійная праграма школы ўключае наведванне старажытных гарадоў Навагрудак і Мір ды вандроўку па «яўрэйскаму» Гродна. Плануюцца лекцыі-канцэрты яўрэйскай музыкі.
Больш інфармацыі можна знайсці на афіцыйным сайце навуковага цэнтра. Там жа можна знайсці анкету ўдзельніка для запаўнення, якую трэба пераслаць да 15 мая 2012 г. па адрасе students@sefer.ru.