Міраслаў Лазоўскі : Беларуская кніга павінна быць паўсюль
Сустрэча адбывалася ў гарадзенскім выдавецтве “ЮрСаПрынт”.
М.Лазоўскі: “Мэтай майго прыезду ў Гародню з’яўляецца пашырэнне Беларускай кнігі. Я прывёз кніжкі, выдадзеныя “Беларускім кнігазборам”.
Маніторынг мінскіх кнігарняў паказаў, што колькасць беларускамоўнай літаратуры скарацілася. Не глядзячы на тое, што ў межах Года Кнігі кнігі выдаюцца, прысутнасць беларускамоўнай літаратуры сучасных аўтараў яшчэ меньшая. Таму зараз Саюз беларускіх пісьменнікаў у межах серыі “Кнігарня пісменніка” выдае менавіта сучасных аўтараў.
Вядома, з пункту гледжання продажу выгодней яшчэ раз выдаць Караткевіча ці Быкава, бо класікаў так ці інакш – набудуць. Але калі новыя аўтары не будуць з’яўляцца, калі іх ніхто не будзе друкаваць, – адкуль тады возьмуцца новы Быкаў альбо Караткевіч? ”
– У якіх гарадах яшчэ былі, і як там сітуацыя з беларускімі кнігамі?
– Шмат ужо дзе быў. Але найлепш пакуль сітуацыя ў Менску. Найбольш беларускамоўны горад – гэта Менск. Прынамсі беларускамоўная літаратура там прадстаўлена лепш, чым у астатніх гарадах, і прадаецца яна лепш. Прынамсі крамы робяць і 2-ую, і 3-ю замовы. Чаго на ўсходзе Беларусі ўвогуле не назіраецца. З Усходам зусім складаная сітуацыя. На Гарадзеншсыне яшчэ пакуль акрамя Гародні не быў.