Гарадзенскі пісьменнік напісаў кнігу пра Алеся Белакоза
Выданне заснавана на некалькіх асабістых размовах аўтара з героем кнігі. Акрамя жыццёвых успамінаў, вялікая частка кнігі прысвечана розным “самарослым рацэптам” ад Алеся Белакоза. Вядома, што ён пакутаваў на рак, але, дзякуючы народнай медыцыне, змог гэтую хваробу пераадолець.
Не дзіва, што за жыццё ў гэтага чалавека сабралося шмат розных рэцэптаў нетрадыцыйнай медыцыны, якія былі правераны на ўласным вопыце. Імі ён і падзяліўся з аўтарам кнігі, а ў выніку і з чытачамі.
Пра гісторыю напісання кнігі ды сваё знаёмства з Алесем Белакозам, а таксама пра свае творчыя планы Міхась Амялішка расказаў “Твайму стылю”:
“Нашае сяброўства пачалося недзе 20 гадоў назад. Разам з хорам “Бацькаўшчына”, удзельнікам якога я з’яўляюся, мы тады наведвалі музей у Гудзевічах. Там я і пазнаёміўся са спадаром Алесем. Мы аднаго ўзросту, у адным годзе скончылі школу, паступалі ў адзін універсітэт, так што агульныя тэмы для размовы знайшліся вельмі хутка.
Для меня ён вельмі цікавы чалавек. Аднойчы я сказаў яму, што хачу напісаць кнігу пра яго: пра лячэнне рака, ды ўвогуле пра яго жыццё. Я хваляваўся, але Белакоз надзіва добра ўспрыняў прапанову. І ўжо потым сам штурхаў мяне да напісання кнігі.
Я правёў тры ці чатыры інтэрв’ю з ім. Менавіта з іх і атрымалася гэтая кніга”.
У планах Міхася Амялішкі напісаць яшчэ некалькі кніжак пра выбітных людзей Гарадзеншчыны. Ён ужо мае нават адмысловы заказ! Калі ж з’явяцца ахвотныя правесці прэзентацыю кнігі пра сапраўды ўнікальнага чалавека – Алеся Белакоза, дык аўтар быдзе толькі рады. Як і рады меркаванням, заўвагам ды крытыцы сваёй працы ад чытачоў.
| Міхась Амялішка нарадзіўся 14 мая 1929 года ў сяле Вольна Баранавіцкага павета. Скончыў Гродзенскі педагагічны інстытут. Працаваў настаўнікам фізікі ў Скідалі. Потым – асістэнтам, старшым выкладчыкам, выконваючым абавязкі загадчыка кафедры фізікі і сельскагаспадарчай метэаралогіі Гродзенскага сельскагаспадарчага інстытута. Аўтар навукова-метадычных работы. З 1989 года – на пенсіі. Прымае актыўны ўдзел у працы хора “Бацькаўшчына” з моманта яго заснавання. Надрукаваў кнігу “Гучыць наш хор”, а таксама раман-успамін “Заблудныя”. | ||
Здымак Якуба Сушчынскага, racyja.eu