Аўтараў «Гродназнаўства» па адным выціскаюць з універсітэту

Калегі і сябры Андрэя Чарнякевіча распавялі, што за мяжой ён далей займаецца гісторыяй, праўда, кантактаваць з прэсай пакуль не хоча.

Яшчэ аднаму з аўтараў «Гродназнаўства», доктару гістарычных навук Вячаславу Шведу, не працягваюць кантракт. Ягоная пасада — загадчык кафедры беларускай культуры і рэгіянальнага турызму.

Вячаслаў Швед даведаўся, што па заканчэньні кантракту больш не будзе ўзначальваць кафедру.

Загад падпісаў яшчэ былы рэктар — Яўген Роўба, якога таксама нядаўна вызвалілі ад займанай пасады.

Швед: «Кантракт у мяне сканчаецца 26 сакавіка, і мне ўжо афіцыйна паведамілі, што яго не працягнуць, але заключаць новы на пасаду прафесара, калі я прайду адпаведны конкурс».

Спадар Швед кажа, што збіраецца праводзіць адкрытыя заняткі і ўдзельнічаць у конкурсе.

Далей займаецца навукай, рыхтуе да выдання чарговую кнігу, гэтым разам пра паўстанцаў 1863 году.

Паводле яго, з выхадам ягонай кнігі чытачы змогуць даведацца новыя імёны паўстанцаў, якія раней ніколі не гучалі.

Швед: «Я знайшоў шмат імёнаў кіраўнікоў паўстання, якіх мы раней не чулі.

Цікава, што кожны другі ці трэці з іх быў афіцэрам царскага войска, але падчас гэтых падзеяў яны пераходзілі на бок паўстанцаў. І ўсе яны былі людзьмі мясцовага паходжання».

Астатнія аўтары «Гродназнаўства»  працягваюць працаваць на сваіх месцах.

Віталь Карнялюк: «Я доктарскую пішу, мая тэма — пра бежанцаў Першай сусветнай вайны. Але пакуль нічога распавядаць не буду — вось напішу, тады можна будзе нешта і казаць».

Алесь Госцеў кажа, што за працай ужо паспеў забыцца пра той скандал, але вось ізноў нагадалі:

«Я надалей займаюся музеем гісторыі пэдагогікі — гэта мая асноўная задача.

Я вельмі хачу прывесьці ўсё тут да ладу».

 

Кнігу-падручнік «Гродназнаўства» напісалі вядомыя гарадзенскія гісторыкі і краязнаўцы. У яе 38 параграфах апавядаецца пра тысячагадовую гісторыю горада.