“Нёман”: свабоднае падзенне працягваецца
У першым тайме сустрэчы, якая адбывалася 17 траўня ў Гомелі, гарадзенцы выглядалі куды лепш за супернікаў.
На фланзе актыўнічаў Савіцкі, але яго прастрэлы у штрафную нічым не сканчаліся. Былі блізкія да ўзяцця варот і Дзянісевіч, і Рэкіш, але і гэтым разам безвынікова.
Другі тайм ўжо застаўся за “Гомелем”, хоць напачатку “Нёман” спрабаваў утрымаць ініцыятыву.
Першы гол у матчы гаспадары забілі на 71-й хв. Першым на дабіванне паспеў Сяргей Канцавы.
Пасля гала “Нёман”, замест таго, каб кінуць усе сілы на атаку, пачаў часта парушаць правілы. Нервы здаюць у Рыбака, які парушае правілы ў сваёй штрафной і зарабляе пенальці. Адзінаццаціметровы дакладна рэалізаваў Матвеенка. У выніку 2:0 на карысць “Гомеля”, які абыходзіць гарадзенцаў у турнірнай табліцы.
Ну а “Нёман” ужо выпаў з шасцёркі мацнейшых на гэты момант каманд краіны.
Турнірная табліца чэмпіянату выглядае зараз такім чынам:
| Месца | Каманда | Гульні | Ачкі |
| 1. | “Шахцёр”, Салігорск | 9 | 20 |
| 2. | БАТЭ, Барысаў | 9 | 17 |
| 3. | “Дынама-Мінск” | 9 | 16 |
| 4. | “Белшына”, Бабруйск | 9 | 15 |
| 5. | “Гомель” | 9 | 13 |
| 6. | “Мінск” | 9 | 13 |
| 7. | “НЁМАН” | 9 | 12 |
| 8. | “Днепр”, Магілёў | 9 | 11 |
| 9. | “Тарпеда-БелАЗ”, Жодзіна | 9 | 12 |
| 10. | “Нафтан”, Наваполацк | 9 | 5 |
| 11. | “Дынама-Брэст” | 9 | 5 |
| 12. | “Славія”, Мазыр | 9 | 4 |
Пасля матчу з “БАТЭ”, які каманда выйграла з лікам 2-1, дружына Сяргея Саладоўнікава не можа абыграць сваіх супернікаў. Апошнія тры матчы гарадзенцы не могуць забіць…
У чым прычына? Сваю версію адказу на гэтае пытанне прапануе адзін са знаўцаў гарадзенскага футбола, адміністратар групы ФК “Нёман” Укантакце Павал Кулік:
Я лічу, што прычына спаду “Нёмана” ляжыць у псіхалагічным стане каманды. Гульцы ўжо пяць матчаў не могуць трапіць у вароты суперніка, трэба сказаць “Дзякуй!” магілёўцу Чарных, які хоць неяк прыўкрасіў гэтую чорную паласу голам у сваю браму.
Ні для каго не сакрэт, што асноўнай нападаючы каманды Андрэй Лясюк не паказвае той гульні, якой ад яго чакалі заўзятары. Дзевяць матчаў без забітых мячоў – гэта занадта шмат, асабліва калі ўлічыць, колькі ў Андрэя было момантаў.
Вось і лічыце, на якім месцы была б цяпер каманда, калі ў кожным матчы дадаць хоць бы па адным забітым мячы…
Многіх заўзятараў каманды перад і пасля гульні з “Гомелем” цікавіла пытанне пра тое, куды ж знік нядаўна набыты славацкі нападнік Мілаш Лачны.
Ходзяць чуткі, што паехаў ажаніцца… Працэс зацягнуўся, але, як бачым, Мілаш ўжо ў дарозе…
Наступную гульню чэмпіянату краіны гарадзенцы згуляюць 24 траўня на сваім полі з жодзінскім “Тарпеда-БелАЗ”.