Чаму з рэк Гарадзеншчыны знікае ласось?

|

Валанцёры і спецыялісты грамадскай арганізацыі “Ахова птушак Бацькаўшчыны” і літоўскія іхтыёлагі даследавалі ніжняе цячэнне ракі.

Яны ацанілі якасць вады, выявілі найбольш выгодныя для нерасту месцы і паразмаўлялі з мясцовым насельніцтвам пра правілы рыбалоўства.

 

“У Беларусь балтыйскі ласось можа зайсці толькі ў Вілію і нерасціцца ў яе прытоках. Ашмянка – у сваім патэнцыяле, адна з найбольш падыходзячых для нерасту рэк”, – распавяла спецыяліст АПБ Вольга Лукшыц.

Любыя забруджванні ракі арганічнымі рэчывамі, напрыклад, угнаеннямі, робяць раку непрыдатнай для ласосяў.

 

У апошнія гады ласось у Ашмянку не заходзіць. Не ў апошнюю чаргу з-за ўплыву сельскай гаспадаркі.

Удзельнікі экспедыцыі выявілі шэраг патэнцыйных пагроз для ракі і ласосяў.

З фермы Рымдзюны ў Астравецкім раёне ў раку сцякала забруджаная арганікай вада.

 

Пад кукурузнае поле ўзараны бераг ракі каля вёскі Солы Смаргонскага раёна.

 

З-за дзейнасці Рачунскай ГЭС вада ў Ашмянцы ўначы назапашваецца, а раніцай скідваецца.

 

Рэзкія перапады ўзроўню і магутная плынь вады ў часе скідаў негатыўна ўплываюць на рыбу.

 

Гэта толькі некаторыя факты, выяўленыя эколагамі, але і іх можа быць дастаткова для таго, каб зрабіць Ашмянку непрыдатнай для такога адчувальнага віду як ласось.

 

Інфармацыю пра ўсе факты парушэнняў прыродаахоўнага заканадаўства ўдзельнікі экспедыцыі перадалі ў тэрытарыяльныя органы Мінпрыроды.

Актывісты АПБ спадзяюцца, што ўсе пагрозы будуць пераадоленыя і нераст ласося ў Ашмянцы зноў стане магчымым.

Экспедыцыя – адно з мерапрыемстваў АПБ у межах кампаніі “Захаваем ласосяў разам!”.

Пяты год эколагі дапамагаюць змагацца з браканьерамі і ствараць умовы для паспяховага нерасту ласосяў на рэках Гарадзеншчыны.

Экспедыцыя ладзілася ў межах праекта АПБ і MadPro (Літва) “Захавальнікі жывых рэк: удзел грамадскасці ў захаванні дзікага балтыйскага ласося ў Беларусі і Літве”.

 

Паводле http://www.ptushki.org