Дрыфт, дрыфт, дрыфт! Экстрэмальны аўтаспорт сабраў сваіх аматараў у Гродне
У спаборніцтвах прынялі ўдзел 19 кіроўцаў з Беларусі, Літвы і Расіі. Дрыфт – тэхніка праходжання паваротаў у кантраляваным заносе, пры гэтым машыны павінны рухацца на максімальнай магчымай хуткасці.
Спачатку кіроўцы стартавалі ў адзіночных кваліфікацыйных заездах. Яны мелі тры спробы на тое, каб максімальна дакладна і эфектна прайсці трасу, не выязджаючы пры заносе за белую лінію.
Потым пачаліся парныя заезды. Першы кіроўца павінен быў ехаць, як і раней, па трасе хутка і відовішчна, задача другога – паўтарыць траекторыю. У наступным заездзе пілоты мяняліся ролямі.
Такім чынам суддзі вызначылі ТОП-4. Чацвёртым стаў гарадзенец Дзмітрый Нагула на сваёй Mazda RX 7.
Тройка пераможцаў аказалася такой:
1 месца – Аляксей Вішнеўскі (Мінск)
2 месца – Мікіта Шыкаў (Маскоўская вобласць)
3 месца – Арцём Камінскі (Мінск)
Наступны этап чэмпіянату Беларусі па дрыфтынгу пройдзе ў Пінску 8 верасня.
Здымкі аўтаркі і Яна Лялевіча