Міліцыя затрымала ў Заслаўі гарадзенскі гурт “Dzieciuki” (абноўлена)

|

Вось што паведамляе пра інцыдэнт сайт tuzin.fm:

 

“Усяго затрымана 15 удзельнікаў здымак. Міліцыянты палічылі здымкі кліпа за несанкцыянаванае шэсьце.

 

Затрымалі на той падставе, што аніякіх дазваляльных папераў музыкі ня мелі.

 

Музыкі здымалі кліп на песьню «Хлопцы-балахоўцы» з свайго альбому «Гарадзенскі гармідар».

 

Яны здымалі кліп недзе з абеда, на ўскрайку Заслаўя.

 

Песьня вымагала адпаведнага антуража, таму музыкі былі апранутыя ў строі часоў грамадзянскай вайны, у камуністаў, белагвардзейцаў…Некаторыя на конях.

 

Так што акром музыкаў там былі гаспадары гэтых коней, а таксама рэканструктуры, гісторыкі, аўтар песень каманды Дзяніс Жыгавец….

 

Фота, зробленае падчас здымак кліпа. Аўтар Наста Рубанава, tuzin.fm

…Алесь Дзянісаў патэліў, сказаў, што іх затрымліваюць. Пакаваць сталі найперш тых, у каго не было пры сабе дакумэнтаў. А хлопцы іх пакінулі ў сваім бусіку, што стаяў у цэнтры Заслаўя…».

 

Музыкаў адпусцілі толькі ў 21.05, больш як праз тры гадзіны пасля затрымання.

 

Піша tuzin.fm:

 

– Алесь Дзянісаў:

 

– “Нам не далі аніякіх афіцыйных тлумачэньняў адносна затрыманьня. Адзінае, што сказалі неафіцыйна, што мы здымалі відэа без дазволу”.

 

Алесь таксама распавёў акалічнасьці затрыманьня. У 17.30 музыкі і здымачная група ўжо скончылі працу. Увесь матэрыял быў адзьняты. Некаторыя пераапраналіся, мусіла быць вячэра. Але лыжкі і відэльцы ўзяць не пасьпелі.

 

Спачатку да іх падыйшлі два амапаўцы, пасьля пад’ехала яшчэ некалькі аўто, у тым ліку аўтазак.

 

Усіх 18 чалавек, якія мелі дачыненьня да здымак, забралі ў мясцовае адзьдзяленьне міліцыі для высьветленьня абставінаў.

 

21.35 Адпусьцілі рэжысэра роліка Антона Цялежнікава. Увесь адзьняты матэрыял для кліпа міліцыянты забралі на 10 дзён – “для высьвятленьня зьместу”.

 

Антон Цялежнікаў адразу пасьля выхаду з адзьдзяленьня міліцыі распавёў Tuzin.fm:

 

– “Мяне адразу вылучылі як адказную асобу, бо я адразу сказаў, што зьяўляюся ініцыятарам і арганізатарам здымак.

 

Таму на мяне зьвярнулі асобную ўвагу. Я сядзеў асобна ад астатніх, фактычна ў калідоры. Пільнавалі мяне, каб не ўцёк, заўжды побач знаходзіўся міліцыянт ці амапавец.

 

Мне сказалі, што асноўная прэтэнзія да нас – адсутнасьць дазволу на здымкі. Шчыра скажу, я не ўяўляў, што такі дазвол патрэбны, бо здымкі ладзіліся прыватным чынам і мы нікому не перашкаджалі.

 

Вельмі спадзяюся, што матэрыял нам вернуць, бо нічога супрацьзаконнага мы не здымалі. Быў зроблены вялікі кавалак працы, шкада будзе яго страціць”.

 

Гурт Dzieciuki (Дзецюкі) быў заснаваны ў Гродне ў красавіку 2012 году. Лідэрам гурта з’яўляецца вядомы гарадзенскі музыка і журналіст Алесь Дзянісаў.

 

Летам гурт зняў кліп пра антысавецкі супраціў у лясах Гарадзеншчыны.