У Гродне вызначылі лепшага вадзіцеля тралейбуса
У сёлетні фінал конкурса выйшла 16 чалавек з 76, каторыя прайшлі адборачны тур спаборніцтваў. А цалкам, як паведаміў Валерый Макарчык, кіраўнік службы арганізацыі руху, ва ўпраўленні налічваецца 304 вадзіцелі. З іх 24 жанчыны зараз ў дэкрэце па догляду за дзецьмі, а сярод астатніх на лініі працуе яшчэ каля сотні жанчын.
Конкурс праводзіўся ў тры этапы – веданне правіл дарожнага руху, правіл эксплуатацыі тралейбуса і практычнае кіраванне. Уласна дрыфт праводзіўся па-за межамі асноўнай праграмы. Гэты від спаборніцтваў ладзілі ў Гродне ўпершыню, каб павысіць цікавасць да конкурса і даць магчымасць вадзіцелям папрактыкавацца ў кіраванні тралейбусам у экстрэмальных умовах. Па словах Валерыя Макарчыка, рыхтаваць гоншчыкаў тут не збіраюцца, але досвед кіравання тралейбусам у экстрэмальных умовах можа быць карысным, калі на практыцы узнікнуць крытычныя сітуацыі.
Галоўная мэта правядзення конкурсу гэта павышэнне прафесійнага майстэрства, а таксама развіцце творчай актыўнасці сярод вадзіцеляў, зазначыў намеснік дырэктара тралейбуснага ўпраўлення Андрэй Эйсмант.
Самі вадзіцелі кажуць, што спаборніцтвы добрая нагода паказаць, што ты рэальна ведаеш і ўмееш, падцвердзіць сваё прафесійнае майстэрства на справе.
У гэтым годзе пераможцам конкурсу, тым, хто набраў найбольшую колькасць балаў, стаў вадзіцель першай катэгорыі Яўген Маёрчык. Ён працуе ў тралейбусным упраўленні ад 2007 года і раней тройчы перамагаў у такіх конкурсах. Аднак сёлетняя перамога будзе для яго вельмі памятнай – ад гэтага года вырашана ўручаць пераможцам пераходзячы кубак, на якім будуць выгравіраваны іх імёны. А гэта значыць, што імя Яўгена Маёрчыка будзе адкрываць спіс лепшых на кубку!
Акрамя пераможцаў конкурсу па катэгорыях і лепшага вадзіцеля вызначалі таксама пераможцу ў дрыфце, ім стаў Алег Купцэвіч, вадзіцель трэцяй катэгорыі з пяцігадовым стажам, і лепшага маладога вадзіцеля – гэты тытул атрымаў Руслан Мусліцкі.
Падзякі і падарункі атрымалі таксама актыўныя ўдзельнікі конкурсу, каторыя не ўвайшлі ў лік пераможцаў.
