Выйшаў гарадзенскі нумар часопіса “Маладосць”

Пасля вядомага часопіса ARHCE і мноства гарадзенскіх перыёдыкаў спецыяльны нумар, прысвечаны нашаму гораду, выдаў і часопіс “Маладосць”.


Пачынанне вельмі добрае, і наагул складваецца ўражанне, што дзяржаўныя часопісы з пула былых літаратурных монстраў (Маладосць-Полымя-Нёман) патроху вяртаюцца да жыцця.

 

Вось і дзіцячую і маладзёвую “Бярозку” ізноў можна набыць у кіёсках, але да славы “Бярозкі” пачатку 90-х ёй яшчэ далёка.

 

Гарадзенскі нумар “Маладосці” адкрываецца шэрагам літаратурных твораў.

 

Сярод аўтараў некалькі гарадзенцаў – Эмілія Комар, Марыя Цітарчук, Аліна Паўлоўская.

 

Найбольш гарадзенцамі, як звычайна, прадстаўлены гістарычны раздзел.

 

Выключна цікавы артыкул Віктара Саяпіна пра нефармальня маладзёвыя рухі савецкага часу з мноствам фотак гарадзенскай моладзі і малавядомых музыкальных гуртоў.

 

Дадзена слова і маладым аўтарам – студэнтам гродзенскага ўніверсітэта Алесю Перагудаву і Мікіту Каранкевічу.

 

Яны расказваюць пра свой праект па апісанні знакаў на Каложы.

 

Ёсць артыкулы па музеязнаўстве, гарадской тапаніміі.

 

Часопіс атрымаўся цікавы і яго, безумоўна, варта прачытаць, шкада толькі, што пакуль нічога не чутно пра прэзентацыю выдання ў Гародні.

 

Хаця, па логіцы, дзяржаўнаму выданню нескладана было бы арганізаваць прэзентацыю ў бібліятэцы імя Яўхіма Карскага.

 

Пакуль жа набыць часопіс можна ў кіёсках Белсаюздруку насупраць кінатэатра “Гродна”, каля аблвыканкама і ў парку Жылібера на прыпынку грамадскага транспарта.