Гарадзенскі “Сокал” працягвае даваенныя традыцыі і спадзяецца на афіцыйную рэгістрацыю

|

Ёсць у Гродне спартыўны клуб, пра які гараджане практычна нічога не ведаюць. А гэтая суполка працягвае ў горадзе слаўныя традыцыі даваеннага спорту. Расказваем пра гарадзенскі спартыўны клуб “Сокал”.


Першыя крокі па адраджэнні клуба, які існаваў яшчэ да другой сусветнай, былі зроблены ў 1996 годзе. Але толькі праз год маладым актывістам удалося адрадзіць даўнюю спартыўную суполку ў Гродне. Заснавальнікам і старшынёй савета клуба стаў Мечыслаў Яскевіч. Асноўнай ідэяй стварэння клуба было аб’яднанне моладзі польскага паходжання, а таксама папулярызацыя праз спорт польскай мовы, культуры і традыцый.


За ўступленне ў “Сокал” бралі 100 марак

 

Пасля бурных падзей пачатку XX стагоддзя Гродна стаў адыходзіць ад войнаў і рэвалюцый. З часам спорт стаў заваёўваць папулярнасць сярод гараджан. У ліку першых у Гродне ў 1920 годзе быў створаны спартыўны клуб “Сокал”. 8 снежня таго ж года адбыўся арганізацыйны сход членаў гімнастычнай супольнасцi. Там было абранае кіраўніцтва “Сокала” і камісія па прыцягненню новых членаў, вызначаны сумы ўнёскаў, месца размяшчэння праўлення. Вырашылі пытанне вядзення дакументацыі і друку.

 

Часовае праўленне клуба складалася з пяці чалавек. Старшынёй стаў А. Скшыпкоўскi, намеснікам старшыні – В. Пашкевіч, сакратаром быў абраны Х. Камінскі, а касірам – В. Пушкевіч.

Прадстаўнікі спартыўнага клуба “Сокал” (1928 год)

 

Уступны ўнёсак складаў 100 марак, а кожны месяц членам грамадства належыла выплачваць па 25 марак. У 1927 годзе ў спартыўным таварыстве было каля 70 спартсменаў, якія займаліся гімнастыкай і лёгкай атлетыкай. Таксама меўся свой футбольны клуб.

 

Варта адзначыць, што гімнастычнае таварыства “Сокал” у 1927 г. выдзяліла каля 2000 злотых на арганізацыю велатрэка па вул. Станіславоўскай.

Цяпер на гэтым месцы гарадзенскі заапарк.

 

Аднак, калі таварыства звярнулася да магістрата за кампенсацыяй уласных выдаткаў, той выдаць грошы адмовіўся.

 

Практычна ніводнае большае спартовае мерапрыемства ў горадзе не праходзіла без удзелу гімнастаў з клуба “Сокал”. Хоць у горадзе былі папулярныя і іншыя клубы, “Сокал” актыўна развіваўся практычна да самай вайны.


Рэгістрацыі няма, але ёсць усе афіцыйныя атрыбуты

 

Яшчэ раней, у 90-х, у клубе культываваўся толькі баскетбол. Каманды былі ў Гродне, Лідзе і Ваўкавыску. Пазней дадаліся футбол, валейбол, лёгкая атлетыка і тэніс.


– Мэта нашага клуба – не спорт высокіх дасягненняў. У першую чаргу нам важны спорт, як сродак маральнага выхавання. Наш клуб займаецца арганізацыяй спартыўных мерапрыемстваў у Беларусі, а таксама арганізуе выезды спартсменаў на турніры ў Польшчу. Там мы ўжо без узнагарод не застаемся. Працягваем слаўныя традыцыі нашых папярэднікаў, – распавядае трэнер клуба Марэк Занеўскі.

Гарадзенская каманда – чэмпіён дзіцячага турніру ў Польшчы

 

На сённяшні дзень клуб афіцыйна не зарэгістраваны і функцыянуе пры непрызнаным уладамі Саюзе палякаў. Але ў яго ёсць усе атрыбуты афіцыйнай арганізацыі: статут, лагатып, галоўны савет клуба.

Каманда “Сокал” на вядомым гарадзенскім турніры “Фанс кап”


Сярод выпускнікоў – капітан зборнай па баскетболе

 

Асноўная задача клуба ў будучыні – здабыць афіцыйную рэгістрацыю. Станоўчы вынік вельмі спросціць дзейнасць і дапаможа значна пашырыць магчымасці клуба.


– Асноўная праблема – неафіцыйны статус. Гэта вельмі моцна абмяжоўвае магчымасці нармальнага функцыянавання. Мы хочам пакінуць у мінулым праблемы з арэндай памяшканняў для трэніровак, забароны на правядзенне розных спаборніцтваў. У будучыні мы хочам развівацца як зарэгістраванае спартыўнае таварыства.


Набор у нас адбываецца і будзе адбывацца ў асноўным на базе польскай школы пры Саюзе палякаў. Для дзяцей заняткі ў клубе гэта дадатковая магчымасць бліжэй пазнаёміцца ​​з Польшчай, польскай культурай і мовай з дапамогай частых выездаў на розныя турніры. Таму бацькі, як правіла, ахвотна аддаюць да нас дзяцей. Таксама заняткі ў клубе не павінны перашкаджаць навучанню ў школе, гэта асноўны прынцып нашай працы з дзецьмі.

 

Выпускніком школы з’яўляецца і цяперашні капітан зборнай Беларусі па баскетболе Аляксандр Кудраўцаў.

Рэгістрацыя клуба, магчыма, дасць штуршок для адраджэння і іншых знакамітых каманд гарадзенскага мінулага.