Студэнты-замежнікі адзначылі ў Гродне Дзень незалежнасці Фінляндыі
На ўнікальным для Гродна мерапрыемстве былі прадстаўнікі Фінляндыі, а таксама беларусы і кітайцы. Месцам сустрэчы стала двухпакаёўка ў цэнтры горада.
Як гэта прынята ў Фінляндыі, святкаванне галоўнага свята краіны пачалося з гімна. Выканаў яго сталічны студэнт Тоні.
– Фінскi народ ціхі і спакойны. Для нас Дзень незалежнасці з’яўляецца адным з галоўных святаў. Менавіта ў гэты дзень усе фіны праводзяць увесь час перад тэлевізарамі, а галоўнай тэмай для абмеркавання з’яўляецца тое, у каго была самая крутая сукенка на свяце, – распавядае Тоні.
Хлопец пабываў у больш за 30 краінах свету, але душа ў яго ляжыць да вывучэння Усходняй Еўропы. З усіх гарадоў Беларусі ён лічыць самым прыгожым менавіта Гродна.
– Я пабываў шмат дзе ў Беларусі. Але Гродна практычна адзінае месца, дзе захавалася гарадская гістарычная архітэктура. У параўнанні з расійскімі гарадамі, у вас яшчэ i вельмі чыстыя вуліцы.
Ініцыятарам святкавання стаў 40-гадовы студэнт Юка, які ўжо два месяцы вучыцца ў Гродне.
– Як і мае калегі, я вывучаю рускую мову ў Хельсінскім універсітэце. У нас ёсць праграма абмену, але жадаючых паехаць у Беларусь амаль не знайшлося. Так я трапіў у вашу краіну. Мог выбіраць паміж Мінскам і Гродна, абраў заходні горад. І вельмі гэтым задаволены, бо ў Гродне ўмовы мне падабаюцца.
За сваё жыццё Юка ўжо паспеў адвучыцца і папрацаваць у сферы турызму, пэўны час ён працаваў таксістам, а зараз зноў вырашыў вучыцца. Ён разумее, што ідзе пяты дзясятак і трэба было б вызначыцца ў жыцці. Але ён лічыць, што ўсяму свой час.
“Твайму стылю” фінскі студэнт раскрыў таямніцу значэння словазлучэння “гарачы фінскі хлопец”.
– Гэта жарт рускіх, якi надакучыў ужо ўсім. На самай справе фіны, не такія ўжо і гарачыя. Мы халодныя…
Акрамя Юка і Тоні, на свяце прысутнічала іх суайчынніца Керту. Дзяўчына дрэнна ведае рускую мову, таму старалася размаўляць з гасцямі на англійскай.
Фінская студэнтка Керту пасярэдзіне
Моўны бар’ер перашкаджаў і азіяцкім дзяўчатам падтрымліваць дыялог. Менавіта яны першымі і пакінулі вечарыну.
Нацыянальнымі стравамі фіны гасцей пацешыць не змаглі, але пра прывезенныя ласункi яшчэ доўга расказвалі. Фінскі рэп і беларускі панк-рок граў доўга, пакуль не надышоў час “ч”. Строга апоўначы ўсе разышліся.