АМАП затрымаў “Банду на Тэчыках”, якая абстраляла маршрутку ў Карэлічах
Інцыдэнт набыў рэзананс, калі ў інтэрнэце сталі абмяркоўваць разборкі, якія мелі месца сярод перавозчыкаў, у выніку чаго з пнеўматычнага пісталета быў расстраляны аўтамабіль. Грамадскасць гаварыла таксама аб нейкай бандзе, якая арудуе ў рэгіёне. За асноўную версію ўзялі яе і супрацоўнікі міліцыі. У выніку, частка чутак аказалася праўдай, паведамляе УУС Гродзенскага аблвыканкама.
90-я forever! “Банда на Тэчыках” абстрэльвае маршруткі ў Навагрудскім раёне
Падставай для здзяйснення супрацьпраўных дзеянняў сапраўды з’явіліся інтарэсы ў сферы перавозак пасажыраў, толькі вось, як аказалася, падазраваныя вядуць бізнэс легальна, займаючыся перавозкай людзей з Карэлічаў і Навагрудка ў сталіцу.
У пачатку сакавіка яны заўважылі транспартны сродак з мінскімі лагатыпамі і палічылі, што ў іх з’явіўся прамы канкурэнт. Разабрацца вырашылі спосабам, характэрным для хвацкіх 90-ых – уначы абстралялі варожы аўтамабіль з пнеўматыкі. Як аказалася, дарма.
У ходзе правядзення спецыяльных мерапрыемстваў па высвятленні асоб падазраваных, аператыўнікі высветлілі, што маршруты бакоў не перасякаюцца. Да гэтага кіроўца пашкоджанага аўтамабіля вазіў людзей з Гродна ў Карэлічы на іншым транспартным сродку, але ён зламалася, з-за чаго фірма на час дала яму іншую маршрутку, зняўшы яе з рэйса Мінск-Гродна.
Па крымінальнай справе аб хуліганстве ў якасці падазраваных праходзяць жыхар Навагрудка 1979 га года нараджэння і яго 34-гадовы прыяцель з Бярозаўкі Лідскага раёна. Абодва былі затрыманыя на тэрыторыі райцэнтра пры сілавой падтрымцы байцоў АМАПА, бо былі падставы меркаваць, што гэтыя людзі могуць аказаць актыўны супраціў супрацоўнікам органаў унутраных спраў. На дадзены момант сабрана дастатковая доказная база, у тым ліку канфіскаваны запіс з камер відэаназірання, на якім бачна, як двое падобных па прыкметах людзей ідуць да месца здзяйснення злачынства.
Дарэчы, у Карэлічах не так шмат камер, але падазраваныя прымудрыліся засвяціцца, абстраляўшы аўтамабіль, на якім вазілі людзей зусім не іх канкурэнты.