Летнія пляцоўкі ў цэнтры Гродна. Дзе выпіць каву пад адкрытым небам?

Летнія пляцоўкі ў цэнтры Гродна. Дзе выпіць каву пад адкрытым небам?

Кафэ “Веранда”

 

Кафэ знаходзіцца на беразе Нёмана, тут можна пасядзець на крытай драўлянай верандзе з відам на раку. У меню пакуль няма адмысловых летніх прапаноў, але афіцыянты раяць пакаштаваць марожаную гарбату ці ліманад, да гэтага – выбраць нешта з дэсертаў.

 

Таксама тут можна з’есці нешта больш сытнае – суп, піцу або цэлы абед.

 

Цэны:

Ліманад – ад 21 тыс.

Капучына – 27 тыс.

Цірамісу – 60 тыс.

 

Адрас: Падольная, 37

Час працы: 12.00-00.00

 

 

Кавярня “Проста кава”

 

У краме-кавярні незвычайная летняя пляцоўка – тут маленькія блакітныя столікі-падстаўкі для кава спалучаныя з такога ж колеру лавамі. У меню – марожаныя кавы, рэцэпт якіх прыдумаў барыста Саша. Сярод іх – кава, у якой змяшаныя эспрэса, апельсінавы сок і сіроп. Як кажа Саша, кава з ноткай кіслага соку дадае энергіі і гэта нашмат лепшая прапанова на лета чым кава з вяршкамі.

 

 

Цэны:

Марожаная кава – 35 тыс.

Торцік – 40 тыс.

 

Адрас: Замкавая, 18

Час працы: 10.00-22.00

 

 

Кавярня “Наша кава”

 

З надыходам цёплых дзён кавярня выставіла перад дзвярыма два столікі і шырока адчыніла акно. На лета барысты прапануюць колд брю – каву, якая рыхтуецца 12 гадзін.

 

 

Цэны:

Колд брю – 25-30 тыс.

Сангрыя – 30 тыс.

Торты – ад 30 тыс.

 

Адрас: Замкавая, 11

Час працы: 9.00-23.00, у пятніцу і суботу да 1.00

 

 

Кафэ “Starlight”

Кафэ яшчэ рыхтуе свае меню да летняга сезона. Пакуль тут можна выпіць амерыкана, з’есці дэсерт ці нешта больш сытнае – піцу ці сэндвіч, а таксама пасядзець на вуліцы, пад ценем парасонаў.

 

 

Цэны:

Капучына – ад 22 тыс.

Мафін – 12,5 тыс.

 

Адрас: Замкавая, 11

Час працы: 9.00-23.00, у пятніцу і суботу да 24.00

 

 

Кавярня і крама-пірожня “Раскоша 1795”

 

Летняя пляцоўка кавярні схаваная ад гучнага жыцця горада ў дворыку. Афіцыянты на летні сезон раяць смузі ці марожанае. Спецыяльнага летняга меню пакуль няма.

 

 

Крама ж выставіла свае столікі з боку вуліцы Савецкай. Тут, перад усім, шырокі выбар пірожных.

 

 

Цэны ў кавярні:

Сырнік – 35 тыс.

Смузі – ад 30 тыс.

Капучына – 29 тыс.

Цэны ў краме:

Амерыкана – 15,6 тыс.

Дэсерт з фруктовым жэле і мусам – ад 20 тыс.

 

Адрас: Савецкая, 7

Час працы: 9.00-00.00 (кавярня), 9.00-21.00 (пірожня)

 

 

Чабурэчная

 

Нядаўна чабурэчная змяніла ўладальнікаў але, здаецца, кантынгент не змяніўся. Тут як і раней можна хутка і танна з’есці і пасядзець на вуліцы у самым цэнтры горада.

 

 

Цэны:

Кава молатая – 13,9 тыс

Блінчык з яблыкам – 9,6 тыс.

Чабурэк – ад 10 тыс.

 

Адрас: Ажэшкі, 1

Час працы: 10.00-22.00, у нядзелю 12.00-22.00

 

 

Кавярня “Шэкспір”

 

Кафэ знаходзіцца ў будынку Тэатра лялек. Тут можна пасядзець у цені дрэваў і парасонаў. У меню шырокі выбар кавы, марожанага, кактэйляў і выпечкі.

 

 

Цэны:

Капучына – 30 тыс.

Круасан – 25 тыс.

Марожанае – ад 25 тыс.

 

Адрас: Дзяржынскага 1/1

Час працы: 9.00-23.00

 

Амато кафэ

 

Кафэ знаходзіцца каля гандлёвага цэнтра “Нёман” – даволі вялікая пляцоўка з прыгожай мэбляй і зялёнай траўкай. Тут можна выбраць месца пад парасонам або на сонцы, паесці марожанае ці дэсерты і выпіць каву.

 

 

Цэны:

Марожаная кава – 33,9 тыс.

Пірожнае “Макарон” – 11,9 тыс.

 

Адрас: Савецкая, 18

Час працы: 10.00-23.00

 

Бар “Магнолія”

 

Летняя пляцоўка кафэ схаваная ад вуліцы – знаходзіцца ў двары. Асартымент тут як у класічнай забягалаўцы: марожанае, піва, кава з аўтамата і чыпсы.

 

 

Цэны:

Марожанае “Пламбір” – ад 6 тыс.

Квас Лідскі – 10 тыс.

 

Адрас: Маставая, 31

Час працы: 12.00-2.00

 

Бар на Тэлеграфнай

 

Бар з традыцыяй, прапануе стравы беларускай кухні. Летняе меню бар рыхтуе толькі з чэрвеня, але ў цёплыя дні ўжо працуе тэраса.

 

 

Цэны:

Кава Lavazza – 25 тыс.

Марожанае – 35 тыс.

 

Адрас: Тэлеграфная, 12

Час працы: 16.00-24.00

 

 

Бістро “Семафор”

 

У меню бістро перадусім абеды, але можна замовіць таксама гарбаты ці каву. Столікі на вуліцы Савецкай выстаўленыя пад навесам, тут можна назіраць за тым, што адбываецца на вуліцы.

 

 

Цэны:

Капучына – 22,5 тыс.

Трубачка з начынкай – ад 13 тыс.

 

Адрас: Савецкая, 23

Час працы: 12.00-23.00, пт-сб да 24.00

 

 

Рэстаран “Карчма ля прычала”

 

Рэстаран з відам на Нёман, з вялікай колькасцю месцаў на летняй тэрасе, з закрытымі ад сонца бяседкамі. Пакуль летняе меню яшчэ ў падрыхтоўцы.

 

 

Цэны:

Капучына – 23 тыс.

Малочныя кактэйлі – ад 35 тыс.

Чызкейк – 41,5 тыс.

 

Адрас: Завадская, 14

Час працы: 12.00-2.00

 

 

Фаст-фуд “Калабкі” ў парку Жылібера

 

Сетка “Калабкі” – кафэ хуткага абслугоўвання. Можна пасядзець за столікамі звонку, з відам на парк, а таксама ў закрытым унутраным дворыку.

 

 

Цэны:

Блінчыкі – 20-40 тыс.

 

Адрас: Ажэшкі, 16 (у парку)

Час працы: кругласутачна

 

 

Забягалаўкі ў цэнтры

 

У традыцыйных забягалаўках госці прыходзяць перадусім выпіць піва і закусіць чыпсамі або паесці марожанага. Кава тут з аўтамата. Іх асартымент мала адрозніваецца адзін ад аднаго. Два з такіх месцаў – у парку Жылібера. Таксама на вуліцы Савецкай у летні сезон адчыняецца кафэ “Губерня”. Намёт паставілі таксама ля крамы “Еўраопт” на вуліцы Ціміразева.

 

 

Дзе паснедаць у Гродне? Вывучаем ранішнія прапановы кавярняў горада

 

Тэстуем “альтэрнатыву” ў прыгатаванні кавы: замест эспрэса-машыны – сіфон