Аляксандра Дораш: Я буду з годнасцю несці званне “Міс Гродна-2016”
Першапачаткова Аляксандра не планавала браць удзел у конкурсе. Дзяўчына цягнула да апошняга, і толькі пасля сур’ёзнай размовы з мамай яна ўсё ж такі падала заяўку на ўдзел у “Міс Гродна 2016”.
Аляксандра ўдала прайшла кастынг і трапіла ў лік 16 дзяўчат, якія рыхтаваліся да фінальнага шоу. Падрыхтоўка да конкурсу адняла шмат часу і сіл: прыгажуне давялося прапусціць пэўную колькасць заняткаў ва ўніверсітэце, а таксама прыйшлося звольніцца з працы, каб наведваць кожную рэпетыцыю (Аляксандра працавала выкладчыцай танцаў для дзяцей, з’яўляецца чэмпіёнкай свету 2012 года па ўсходніх танцах).
“Ужо на кастынгу я сустрэла шмат знаёмых дзяўчат, таму галоўнай мэтай была не перамога, а ўдзел. Я прыйшла за новымі адчуваннямі, эмоцыямі і сябрамі. Лічу, што менавіта з такой мэтай трэба ісці на конкурсы прыгажосці, а не за перамогай. Важна набыць нейкія навыкі, навучыцца сябраваць ў жаночым калектыве. Бо шмат хто лічыць гэта складаным, але ў нас дзяўчынкі вельмі добра ставіліся адна да адной. Мы атрымалі кучу эмоцый і пазітыву, каб потым з усмешкай успамінаць гэты выдатны час. У выніку менавіта гэта я і атрымала, праўда, як я кажу, з дадатковым бонусам – каронай і тытулам “Міс Гродна – 2016”, – распавядае Аляксандра
Апошнія два тыдні ў канкурсантак рэпетыцыі праходзілі кожны дзень (у тым ліку і выходныя) з 19.00 да 22.00. Дзяўчаты вельмі стамляліся, але разумелі, дзеля чаго яны ўсё гэта робяць.
Адной з умоў конкурсу было абавязковае наведванне салярыя. Пасля рэпетыцый канкурсанткі беглі яшчэ і туды.
“Я прыходзіла дадому і адразу клалася спаць. Напэўна, для многіх было складана рабіць нейкія новыя танцавальныя элементы, якія далей выкарыстоўваліся ў пастаноўках для конкурсу, але мне пашанцавала з гэтым – у мяне не было праблем, бо я чалавек танцуючы”.
Самым складаным для Аляксандры стаў апошні тыдзень перад конкурсам. У дзяўчыны прапаў голас, трымалася высокая тэмпература.
“Вельмі перажывала, што голас не адновіцца да 20 траўня, і калі прайду ў лік фіналістак, я не змагу нармальна адказаць на пытанне ўжо на самім конкурсе. Наогул, днём я ляжала дома з тэмпературай, а ўвечары, нягледзячы на дрэннае самаадчуванне, выкладалася на 100% на рэпетыцыях. Хутчэй гэта і было самае складанае для мяне. Не буду хаваць – была паніка, што не папраўлюся да конкурсу. Але я, напэўна, з тых людзей, якія нават з тэмпературай выйшлі б на сцэну”.
У выніку на фінальным шоу Аляксандра патрапіла ў лік галоўных фіналістак, а потым па выніках журы і зусім стала ўладальніцай кароны “Міс Гродна 2016”.
У Гродне абралі Каралеву прыгажосці 2016 году – ёй стала будучая журналістка
“Мая перамога – гэта сумленны выбар журы. Скажу адно: я лічу сябе прыгожым чалавекам, але не ў плане знешняй карцінкі, якую бачаць людзі. У мяне добрае сэрца і багаты ўнутраны свет, гэта самыя галоўныя якасці, якія павінны быць у чалавека. Магчыма, менавіта гэта і разгледзелі члены журы.
Але таксама я не магу сказаць, што я асаблівая. Я звычайны чалавек, звычайная дзяўчына. І лічу, што кожная з 16 фіналістак была вартая кароны. Гэта ж наша агульная праца, усе мы ўклалі шмат сіл, і кожная старалася.
Шчыра – я не чакала, што выйграю. Я стаяла на ўзнагароджанні і нават не ўяўляла, што праз пару хвілін буду прымяраць карону. Таму я расплакалася, калі вядучыя абвясцілі нумар 7. Я ведала адно, што буду радавацца за тую, якая пераможа. Менавіта з такім настроем трэба прымаць удзел у конкурсе”.
На самім конкурсе Аляксандра знайшла новых сябровак. А праца з дасведчанымі педагогамі стала бясцэнным вопытам для маладой дзяўчыны.
“Што тычыцца падарункаў, то пералічваць вельмі доўга. Шмат розных грашовых сертыфікатаў, кветак, касметыкі і шмат чаго іншага. Але гэта ўсё не так важна, галоўны падарунак для мяне – гэта сам тытул і тое, што ў мяне была такая выдатная магчымасць прыняць удзел у конкурсе. Бо гэта так важна – бачыць усмешкі родных і блізкіх са сцэны, якія магчыма перажывалі больш за мяне, плакалі ад шчасця, падтрымлівалі і проста былі побач. Да гэтага часу не верыцца, што карона дасталася мне. Я абяцаю, што буду з годнасцю несці званне “Міс Гродна-2016”.
align=”” width=”725″ height=”544″ >
У Планах Аляксандры – працягваць вучыцца, атрымліваць асалоду ад жыцця і проста заставацца добрым чалавекам. Што тычыцца мадэльнай сферы, то дзяўчына чакае новыя прапановы. Бліжэйшы паказ мод, у якім яна прыме ўдзел, будзе “Grodno Fashion Show – 2016”.
Дарэчы, Аляксандра ў 2015 годзе стала “Міс універсітэт”, і там таксама выступала пад шчаслівым нумарам 7. Таксама на заметку хлопцам: у новай “Міс Гродна 2016” ёсць малады чалавек, які падтрымлівае яе ва ўсіх пачынаннях.