Гарадзенка перамагла на Сусветным боды-арт-фестывалі
Візажыст з Гродна Дар’я Іодэль была адзінай беларускай на фестывалі. Яна прадставіла сваю працу ў намінацыі “Крэатыўны макіяж” і выйграла.
– У прафесіі я ўжо дзевяты год. Працую візажыстам з 19 гадоў. Мне заўсёды было цікава ствараць маштабныя работы, якія тычацца менавіта арт-адгалінаванняў ад класічнага макіяжу, – кажа Дар’я ў каментары для TUT.BY.
На тое, каб паўдзельнічаць у сусветным форуме прафесіяналаў, дзяўчыну натхніла сустрэча з вядомым крэатыўным візажыстам Дзянісам Карташавым. Яна пабыла яго асістэнтам і вырашыла паехаць на фэст у Аўстрыю, каб там паспрабаваць свае сілы.
– Падрыхтоўка да чэмпіянату заняла ў мяне паўгода. Важна было прадумаць усё да дробязяў, таму што маштаб мерапрыемства абавязваў паказаць вышэйшы пілатаж. Трэба было прадэманстраваць тэхнічныя навыкі, стварыць незвычайны вобраз, прадумаць каляровае рашэнне і галоўнае – абыграць тэму намінацыі, якая была прадыктавана журы конкурсу. У гэтым годзе нам прапанавалі такую: “Рэтрадрама, рокавыя дзівы эпохі нямога кіно, шарм дэкадансу і магнетычная графіка ар-дэко”.
align=”” width=”725″ height=”883″ >
Дзяўчына доўга прадумвала вобраз сваёй мадэлі, імкнучыся аб’яднаць моду, мастацтва, новыя тэхналогіі і застацца ў рамках заяўленай тэмы. У выніку праца гродзенкі вельмі спадабалася журы міжнароднага конкурсу.
– У пачатку прадстаўлення вочы і вусны мадэлі зачыненыя адмысловымі лінзамі. Падчас прэзентацыі лінзы расчыніліся і пад імі ўжо можна было бачыць візаж. За механізмам я ездзіла да таленавітага фокусніка ў Маскву. З дапамогай абранай формы макіяжу хацела стварыць эфект паменшанага твару, драматычнай “маскі”, якая стварае абсалютна новае адчуванне ад ўспрымання асобы мадэлі. Пры пашыве касцюма натхненнем былі паказы легендарнага Джона Гальяна, які вельмі любіць ў сваіх калекцыях выкарыстоўваць рэтрастылітыку зорак эпохі нямога кіно, – распавядае Дар’я.
Дзяўчына прызнаецца, што ўвесь час сутыкалася з нейкімі цяжкасцямі: то немагчыма было знайсці патрэбныя матэрыялы для пашыву касцюма, то праблемай стала адшукаць батарэйкі для механізму з патрэбнай энергаёмістасцю. І, вядома, адбіваліся хваляванне і напружанне ў дзень намінацыі.
– Побач са мной былі ўдзельнікі, якія маюць досвед працы на сусветных шоў і паказах. Каб стварыць вобраз, кожнаму ўдзельніку конкурсу далі 1,5 гадзіны. Важна было перамагчы хваляванне і страх і ўсё зрабіць хутка і выразна. Прызнаюся, адчувала ўвесь конкурсны дзень такую ступень напружання, што на сцэне проста нічога не бачыла, толькі чорную заслону. Памятаю, як вельмі моцна абдымала ўсіх членаў журы, трасучыся ад эмоцый. Вядома, я рада сваёй перамозе – гэта не толькі статус, доказ майстэрства і ўзроўню, але і перш за ўсё перамога над сваімі асабістымі эмацыйнымі страхамі і магутная псіхалагічная загартоўка.