Вялікая валанцёрская ўборка пройдзе ў Беларусі 1 кастрычніка: далучыцца можна ў Гродне, Слоніме і на Сарачанскіх азёрах
Акцыя “Зробім!” у Гродне: студэнты прыбралі старыя праваслаўныя могілкі
– Пасля лета ў лясах засталося шмат смецця. Сустракаюцца і цэлыя стыхійныя звалкі. Мы прапануем усім не проста абурацца ў інтэрнэце, але і прыбраць гэтае смецце, робячы прыроду чысцей для сябе і іншых людзей, – распавяла прадстаўнік аргкамітэта акцыі Надзея Дубоўская.
Акцыя добраахвотная, у ёй можна паўдзельнічаць некалькімі спосабамі: арганізаваць сваю ўборку, далучыцца да ўжо сабранай групы валанцёраў, правесці разам з калегамі карпаратыўную ўборку, дапамагчы арганізатарам “Зробім!” матэрыяльна або інфармацыйна. З любымі пытаннямі і прапановамі аб удзеле пішыце арганізатарам на zrobimbelarus@gmail.com.
Ужо запланаваныя ўборкі ў Гродне, Слоніме і на Сарачанскіх азёрах. Знайсці кантакты арганізатараў можна ў табліцы.
Акцыю каардынуе аргкамітэт, у які ўваходзяць прадстаўнікі установы “Цэнтр экалагічных рашэнняў”, таварыства “Зялёная сетка”, фонду “Інтэракцыя”, грамадскай арганізацыі “Мінскае веласіпеднае таварыства” і іншых некамерцыйных арганізацый.
Беларусь ужо ў шосты раз праводзіць такую акцыю. У ёй удзельнічаюць не толькі звычайныя грамадзяне, але і ВНУ, грамадскія ініцыятывы і камерцыйныя кампаніі. Арганізатары просяць дадаваць вядомыя вам засмечаныя месцы на спецыяльную карту, каб да дня акцыі скласці спіс месцаў, дзе патрэбна ўборка.
“Зробім!” – Беларуская частка сусветнага валанцёрскага руху па ўборцы “Let`s Do It!”, якое аб’ядноўвае 112 краін. Яго ўдзельнікі прыбіраюць месцы, дзе ўтварыліся стыхійныя звалкі: зоны адпачынку ў гарадах, лясы, пляжы, берагі вадаёмаў.