Суд над гродзенскай студэнткай перанесены на 23 сакавіка

|

Падчас працэсу суддзя Ленінскага раённага суда Гродна Наталля Козел заслухала саму Кацярыну Герасімчык і двух міліцыянтаў дэпартамента аховы Эдуарда Багдановіча і Сяргея Рышкеля, якія сведчылі супраць яе.

 

На думку прадстаўніка Беларускага Хельсінскага Камітэта Рамана Юргеля (на здымку ніжэй на дальнім плане), яны сведчылі непераканаўча:

 

– У гэтым выпадку справа можа быць проста сфабрыкаванай міліцыяй, таму што на кагосьці трэба «павесіць» гэты надпіс, гэты пратакол, гэты рапарт, ды ўсю гэтую камедыю.

 

Таму ў нас будзе прыцягнутай да адміністрацыйнай адказнасці наша студэнтка.

>

Сама Кацярына Герасімчык не прызнае сваёй віны:

 

– “Я не казала ў момант затрымання, што прызнаю сваю віну і, тым больш, гэтага няма ў пратаколе.

 

Другі міліцыянт наогул сумняваўся ў тым, што я нешта малявала – ён дакладна так і сказаў у судзе:

 

«Я не ўпэўнены, што менавіта гэтая дзяўчына нанесла надпіс на помнік Леніну».

 

Гэта супярэчыць пратаколу і супярэчыць майму абвінавачванню”.

 

Пасля таго як Кацярына Герасімчык заявіла хадайніцтва пра дадатковае азнаямленне з матэрыяламі справы, суд быў перанесены на 23 сакавіка.

 

Побач з помнікам Леніну позна ўначы Кацярына Герасімчык апынулася разам са сваёй аднакурсніцай Вольгай Багданкевіч – яны вярталіся дамоў.

 

Дзяўчаты мелі пры сабе налепкі Маладога фронту і раздрукоўкі з надпісам «Свабоду Кіркевічу», «Свабоду Някляеву», «Свабоду Фядуту».

 

Такія налепкі былі расклеены ў цэнтры Гродна.

 

Днямі пастановаю адміністрацыйнай камісіі дзяўчат пакаралі штрафамі ў памеры 10 мінімальных зарплат кожную, прызнаўшы вінаватымі ў расклейванні налепак.

 

Вацлаў Галімскі, Валянціна Лаеўская, Радыё Рацыя