Андрэй Пачобут піша з турмы

|

Пачобут піша:

Вечар. Сукамернік Толя, якога судзяць за махлярства, піша працяг “Маўглі”, і вельмі перажывае, што яго можа падмануць выдавец, я ж пішу вам ліст.

Вы напэўна за мяне перажываеце?

А я перажываю за вас.

Ці не запугаў вас мой пацярпелы?

Ці не паламаў?

 

У мяне тут усё ў парадку. У турме як у турме.

Да тутэйшай рэчаіснасці я хутка адаптаваўся.

Час забіваю чытаннем кніг (дзякуй Арлову) і фізічнымі практыкаваннямі.

Так як басейн тут не паложаны, абмяжоўваюся спартанскімі: адцісканнямі, практыкаваннямі для прэса, прысяданнямі… У выніку ўсё цела гудзе.

 

Дзякуй за віншаванні з Днём нараджэння.

У такіх умовах мне яго святкаваць яшчэ не даводзілася. Усё было сціпла і па-спартанску.

Але свята было, былі віншаванні і нават сціплы падарунак ад сукамернікаў.

 

Лісты пішу рэдка.

Паколькі пісаць ва ўмовах цэнзуры не прызвычаіўся.

Толькі тут зразумеў, якія пачуцці  апаноўваюць  супрацоўнікаў дзяржаўных СМІ, калі нельга напісаць самае цікавае таму, што цэнзура не прапусціць.

Розніца толькі ў тым, што мяне сюды “закаталі”, а яны самі добраахвотна апранулі нашыйнікі. Але перажываць за іх не будзем, кожнаму свой лёс належыць.

 

З нецярпеннем чакаю суда, думаю, ён будзе вельмі вясёлай і нават камедыйнай падзеяй.

Фінал яго, канечне ж, вядомы, але гэта той выпадак, калі вынік меньш важны чым працэс.

Увогуле, удачы! Поспехаў! Веры!

23.04.11.

Супраць Пачобута, арыштаванага 6 красавіка, заведзеныя адразу дзве крымінальныя справы: абвінавачванне ў абразе прэзідэнта (частка І, артыкула 368 Крымінальнага кодэксу) і ў паклёпе на яго (частка І, артыкул 367 КК).

 

З заклікам вызваліць Андрэй Пачобута да беларускіх уладаў звярнулася “Gazeta Wyborcza”, у якой журналіст працаваў.

Зварот у пракуратуру з патрабаваннем спыніць незаконны пераслед гродзенскага журналіста Андрэя Пачобута накіравалі сябры гродзенскай філіі Беларускай асацыяцыі журналістаў.