“Райскі сад” расквітнеў у цэнтры Гродна

|

Куратар выставы, навуковы супрацоўнік музея Ірыны Ахотніцкая тлумачыць:

 

Назва “Мой райскі сад” абраная невыпадкова. На выставе прадстаўленыя каля 100 цуда-дрэў і кветкавых букетаў. Гэта своеасаблівы рай Надзеі Пальчынскай, які знаходзіцца, перш за ўсё, у яе душы. “…Царства Божае ўнутры вас”, – гаворыць Хрыстос (Лк. 17, 21). І творчасць Надзеі – сведчанне добрага і светлага бачання навакольнага свету і людзей, з якімі яна дзеліцца сваёй любоўю і радасным светаўспрыманнем. Надзея запрашае ўсіх наведаць яе райскі сад – Царства Божае, якое жыве ў яе маленькім, але такім шчодрым на дабро сэрцы.

 

 

Па словах супрацоўніцы, мерапрыемствы, прысвечаныя такім сацыяльным праектам, у Музеі гісторыі рэлігіі праходзяць дастаткова часта. Але вось такая персанальная выстава дзяўчыны з абмежаванымі магчымасцямі праходзіць упершыню.

 

Бісерапляценнем Надзея займаецца ўжо пяць гадоў. Калі ў пачатку года арганізатар выставы дамаўляўся пра лік экспанатаў, каб запоўніць пэўную колькасць вітрын, маці сказала без сумневаў – будуць. Менш чым за паўгады дзяўчына зрабіла палову экспазіцыі. Была выканана тытанічная праца. Маці Людміла Васільеўна падзялілася:

 

Яшчэ калі яна была маленькая і знаходзілася на хатнім навучанні, бачыла, як дзеткі займаюцца, і ўсё прасіла ў мяне. Але такіх ўмоў у мяне не было. Калі пачалі хадзіць на заняткі па бісерапляценні, адразу ўсё пачало атрымоўвацца. Ручкі працуюць, галоўка працуе. І мабыць, у яе выявілася жаданне.

 

 

Каля двух гадоў назад апеку над Надзеяй узяло на сабе праваслаўнае маладзёвае Свята-Уладзімірскае брацтва, якое і выйшла з ініцыятывай арганізацыі выставы ў музеі. Ад імя аддзела па царкоўнай дабрачыннасці і сацыяльным служэнні Гродзенскай праваслаўнай епархіі прывітаў аўтарку выставы і гасцей айцец Грыгорый:

 

Хацелася падзяліцца сваімі ўражаннямі. Калі мы маем на ўвазе людзей з абмежаванымі магчымасцямі, то цяжка сабе ўявіць, на што такія людзі здольныя. Думаю, што пабачыўшы гэтае тварэнне рук Надзеі, сумневы адпадаюць, што такі чалавек мае якія-небудзь абмежаванні ў жыцці.Чалавек і яго настрой глыбока ўнутры.

 

Айцец Грыгорый падарыў Надзеі ікону Жыровіцкай Божай Маці.

 

 

У кастрычніку ў Гродна адбудзецца вялікі міжнародны форум Інтэр-музей. Адным з цікавых момантаў, па словах дырэктара музея Людмілы Карнілавай, будзе паказаць музеям такую выставу як выдатны прыклад магчымасці працы з людзьмі з абмежаванымі магчымасцямі. Таму выстава працягнецца да снежня.