У Гродне прайшла першая вега-сустрэча з удзелам гасцей з Масквы

|

Сустрэча пачалася з таго, што гарадзенскія вега-актывісты распавялі пра першыя крокі ў сваёй дзейнасці, праблемы, і пра тое, як у рэстаранах горада з’явіліся абазначэння вегетарыянскіх страў.

Юлія Каляда, актывістка гарадзенскага вега-руху:

 

“Шмат вегетарыянцаў скардзіліся на тое, што не хапае адзнак у меню ў пунктах харчавання горада. Мы правялі трохмесячную працу з гарадзенскімі кафэ і рэстаранамі. Пасля гэтага з’явіліся адзнакі ў некаторых рэстаранах і наладзіліся кантакты з рэстаратарамі.


Калі 10 гадоў таму вегетарыянства было нейкай субкультурай тыпу панкаў, цяпер многія становяцца вегетарыянцамі не толькі па этычных прычынах, колькі з-за здаровага харчавання.


Нам вельмі хацелася б, каб вегетарыянства было на слыху, і людзі не ставіліся да яго як да секты. Сёння сітуацыя ўсё больш пачынае мяняцца і колькасць вегетарыянцаў расце”.

Да праблем, якія на сённяшні дзень вылучаюць гарадзенскія вегетарыянцы, адносяцца адсутнасць у меню страў без мяса, адсутнасць адзнак, невуцтва персаналу ў адносінах да вегетарыянцаў і няпоўнае ўказанне інгрыдыентаў страў.

 

У другой частцы вечара актывісты з Масквы Алег Возераў і Мікіта Юшкоў распавялі аб веганскім мысленні, здаровым харчаванні і абароне жывёл.

Мікіта Юшкоў:

 

“Мы ездзім па гарадах былога Савецкага саюза. Толькі вярнуліся з Тбілісі, дзе ладзілі падобныя сустрэчы і знаёмілі мясцовую моладзь з зааабарончымі праектамі.

 

Сваёй дзейнасцю мы хочам падняць рух абароны жывёл у рускамоўных краінах, каб людзі задумаліся над сваімі дзеяннямі, і жывёлам стала лягчэй”.

 

Зааабаронцы распавялі пра тое, што ў Тбілісі ў бліжэйшы час з’явіцца еўразійская штаб-кватэра зааабарончыя руху, дзе будуць кансалідаваны ўсе сілы зааактывістаў з Расіі, Украіны, Беларусі, Грузіі і Арменіі.

Алег Возераў:

 

“Я ўзгадваю 2007 год, калі  я пачынаў займацца гэтым, як было тады і як цяпер. І скажу, што прарыў бачны. Зааабарончы рух, вегетарыянства і веганства разрастаюцца і становяцца ўсё больш папулярнымі.


У Беларусі пакуль няма як такавога руху абароны жывёл. Ёсць нейкія разрозненыя групы, якія нешта спрабуюць рабіць. Я спадзяюся, што ў будучыні сумеснымі высілкамі і за кошт падтрымлівання кантактаў, мы зможам дамагчыся большых вынікаў”.

 

Сустрэча завяршылася паказам італьянскага мастацкага фільма пра радыкальных абаронцаў жывёл “Аўрора. Сны аб свабодзе”. Кінастужка распавядае пра зааабарончы актывізм у Італіі, таму што менавіта гэтая краіна займае лідзіруючыя пазіцыі па колькасці вегетарыянцаў у Еўропе.

Таксама на сустрэчы ўпершыню ў горадзе быў праведзены фрымаркет. Усе жадаючыя змаглі падзяліцца рэчамі, якія яшчэ можна выкарыстоўваць, каб скараціць спажыванне і колькасць смецця.

Дарэчы, пасля вега-сустрэчы ў меню бара “Куба” таксама з’явіліся адмысловыя адзнакі насупраць вегетарыянскіх страў.