Завершана рэстаўрацыя найстарэйшага алтара Гродзенскай катэдры

Завершана рэстаўрацыя найстарэйшага алтара Гродзенскай катэдры

Пра тое, як адбывалася аднаўленне і якія планы далейшай рэстаўрацыі чакаюць галоўны каталіцкі храм Гродзеншчыны, нам распавёў кс. Ян Кучынскі, пробашч Гродзенскай катэдры.

“Роўна год таму мы распачалі працу па аднаўленню гісторыка-культурнай і рэлігійнай матэрыяльнай каштоўнасці Гродзеншчыны. Першае, што нас вельмі ўразіла, калі толькі мы распачалі рэстаўрацыю, дык гэта тое, што алтар якімсці цудам яшчэ трымаўся”.

Сама рэстаўрацыя, паводле словаў душпастара, праходзіла некалькімі этапамі: на першым этапе правялі аналіз стану каштоўнасці і план далейшых рэстаўратарскіх прац. Наступны этап патрабаваў прапіткі драўляных элементаў алтара адмысловымі рэчывамі, супраць далейшага знішчэння (прафілактыка), а таксама ўзмацнення яго канструкцый.

Трэці этап прадугледжваў рэстаўрацыю двух абразоў: Св. Міхала Арханёла і абраз на якім прадстаўлены святыя Клеменс, Францішак і Антоній. Апошнім этапам было фарбаванне і пазалота алтара.

Галоўны катэдральны душпастар таксама ўзгадаў пра цікавую знаходку – тры акруглыя кулі, магчыма, з часоў вайны 1812 года.

Пасля завяршэння прац на гэтым важным аб’екце, працэс аднаўлення ўнутранага ўбранства Гродзенскай катэдры не завяршаецца. Плануецца аднаўленне васьмі наступных алтароў, сярод якіх у першую чаргу маецца быць адрэстаўраваны алтар св. Тройцы (працы, магчыма, распачнуцца ў наступным годзе).

Паводле кс. Яна Кучынскага, рэстаўрацыя была праведзеная дзякуючы ахвяраванням вернікаў Гродна і працы шасці рэстаўратараў з Мінска, да якіх ён кіруе выразы сваёй ўдзячнасці: “Дзякую ахвярадаўцам і ўсім людзям добрай волі за дапамогу пры аднаўленні самага старога алтара ў нашай святыні і запэўніваем памятаць пра Вас у нашай малітве праз заступніцтва св. Міхала Арханёла. Няхай Бог аддзячыць Вам за Вашыя добрыя і адкрытыя сэрцы!”.

Урачыстае адкрыццё і свячэнне алтара адбудзецца 29 верасня, у свята Святых Арханёлаў Міхала, Габрыэля і Рафала, а 12-й гадзіне.