Адведай 85 “разынак” Гарадзеншчыны: Шчучынскі раён

|

Нашай правадніцай па Шчучыншчыне стала вядомая журналістка і фатограф Ала Бібікава.

 

1. Цудатворны абраз Маці Божай Ракавіцкай і цудатворная крыніца

Прыехаўшы на Шчучыншчыну, трэба абавязкова пабываць ў в. Ракавічы, што ў 13 кіламетрах ад райцэнтра.

Там у Свята-Ражства-Багародзічнай царкве знаходзіцца найвялікшая святыня Шчучыншчыны – абраз Маці Божай Ракавіцкай.

 

Згодна паданню, у 1748 годдзе ён трапіў да мешчаніна Макрэцкага, якому перад гэтым прысніўся вешчы сон.

 

Раніцой той пайшоў да азначанага месца ля ракі, дзе і ўбачыў ікону, што плыла па вадзе. Пешшу спадар Макрэцкі адправіўся ў Вільню, дзе з маленькай іконы зрабілі прыгожы вялікі спіс. Цудатворны абраз праявіў сябе шматлікімі цудамі вылячэння хворых. Сапраўдным цудам вернікі лічаць і той факт, што ні пры якіх уладах царква не зачынялася.

 

Штогод 9-10 жніўня шматлікія паломнікі прыходзяць у в. Ракавічы да заступніцы, каб прасіць аб дапамозе, падзякаваць за міласць і разам памаліцца. Багародзіца дапамагае ўсім, хто звяртаецца да яе са шчырым сэрцам.

 

Дарэчы, рачулка змялела, амаль знікла, а там, дзе быў здойдзены абраз і сёння бруіцца цудатворная крыніца, чыя гаючая вада дапамагае хворым людзям, ачышчае духоўна, надае сілы.

 

2. Клуб-музей Чэслава Немэна і касцёл святых апосталаў Пятра і Паўла ў вёсцы Старыя Васілішкі

Старыя Васілішкі – малая радзіма знакамітага польскага музыканта, кампазітара і спевака Чэслава Немэна (Выджыцкага).

 

У 2010-м годзе там быў адчынены клуб-музей – адзіны ў свеце музей рок-музыканта. У звычайнай сялянскай хаце, дзе нарадзіўся і вырас Чэслаў Выджыцкі і дзе сабраны шматлікія фотаздымкі, плыты, рарытэтныя рэчы, гучыць яго непаўторны голас.

 

Вам распавядуць гісторыю яго вучобы і першага кахання, раскажуць пра тое, як ён сумаваў па радзіме, а, дасягнуўшы славы, запрашаў землякоў на канцэрты, у перапынках паміж гастролямі імчаўся на таксоўцы ў родныя мясціны ажно з Масквы…

 

Трапіўшы ў Старыя Васілішкі, абавязкова зайдзіце ў велічны чырвоны касцёл – святых апосталаў Пятра і Паўла, дзе вісіць мемарыяльная дошка ў гонар Чэслава Немэна, а ўнікальныя вітражы з біблейскімі сюжэтамі выкананы ў лепшых традыцыях еўрапейскага вітражнага мастацтва.

 

3. Коркавы гай

Недалёка ад райцэнтра ў наваколлі вёскі Ялашаўцы раскінулася цэлая плантацыя коркавага дрэва (яно ж аксаміт Амурскі), якую ў 1954 годзе заклалі работнікі Шчучынскага лясніцтва.

 

Ці ж не дзіва, што дрэвы, радзімай якіх з’яўляюцца паўднёвыя шыроты, прыжыліся ў нашай мясцовасці?!

 

Дарэчы, кара коркавага дрэва з’яўляецца элітным прамысловым матэрыялам, а шчучынскія гімназісты разам з супрацоўнікамі лясгасу распрацавалі турыстычны маршрут для турыстаў акурат да коркавага гаю.

 

4. Палац Святаполк-Чацвярцінскіх у г.п. Жалудок

Родавы палац княжацкага роду Святаполк-Чацвярцінскіх, пабудаваны ў 1908 годзе па праекце італьянскага архітэктара Марконі ў стылі неабарока з элементамі мадэрна – самы шматпакутны і самы папулярны ў кінематаграфістаў палац.

 

Тут здымаліся хорар “Масакра”, прыгодніцкі фільм “Кіндэрвілейскі прывід”, шэраг дакументальных стужак і музычныя кліпы.

 

Год таму палацавы комплекс перайшоў ва ўласнасць расійскай сям’і, якая плануе давясці гістарычную каштоўнасць да ладу і стварыць тут самабытны турыстычный комплекс.

 

5. Зёлкавыя плантацыі аграпрадпрыемства “Вялікае Мажэйкава”

Неабсяжныя духмяныя бялюткія і аранжавыя палеткі – плантацыі рамонку і календулы – сапраўднае дзіва для турыста. “Вялікае Мажэйкава” – адзінае ў краіне аграпрадпрыемства, якое займаецца прамысловым вырошчваннем лекавых раслін. Зёлкамі тут занята 470 гектараў!

 

Уборачная гарачая пара ў гаспадарцы пачынаецца ў чэрвені і заканчваецца глыбокай восенню.

 

Збіраюць лекавыя травы менавіта ў той час, калі яны утрымліваюць максімальную колькасць карысных рэчываў. Каб мы маглі купіць у аптэках якасныя цудадзейныя зёлкі, напоеныя сонцам і сіламі роднай зямлі.


Чытай таксама:


Адведай 85 “разынак” Гарадзеншчыны: Астравецкі раён


Адведай 85 “разынак” Гарадзеншчыны: Ваўкавыскі раён



Фота аўтара