Парэшткі 300 чалавек пахаваюць у Коматаве

|

Парэшткі людзей к.15-18 стагоддзяў былі знойдзены ў мінулым годзе падчас раскопак археалагічнага аб’екта ў вёсцы Коматава Гродзенскага раёна.

 

Дацэнт кафедры археалогіі і этналогіі Гродзенскага дзяржаўнага ўніверсітэта імя Янкі Купалы Генадзь Семянчук:

Гэта былі выратавальныя раскопкі.

У выніку будаўніцтва ГЭС на Нёмане, каля 30 археалагічных помнікаў трапляюць у зону затаплення.

Таму мінулым летам кафедра археалогіі і этналогіі правяла ў гэтай зоне раскопкі хрысціянскага могільніка.

Мы даследавалі каля 10% могільніка, гэта амаль 500 квадратных метраў, знайшлі каля 300 пахаванняў, рэшткі царквы 17 стагоддзя.

Цяпер маем дакладнае ўяўленне пра абрад пахавання, знойдзены элементы матэрыяльнай культуры: пярсцёнкі, завушніцы, шмат цвікоў, манеты, значная колькасць фрагментаў керамічнага посуда.


Сёння, пасля правядзення антрапалагічных даследванняў, парэшткі больш за 300 чалавек, пахаваных некалькі стагоддзяў таму на могілках Коматава-5, зноў  вернуцца ў зямлю.

Г.Семянчук:

У нас няма спецыяльных антрапалагічных інстытутаў, таму, чым гэтыя косткі будуць захоўвацца дзесці ў скрынях, няхай яны зноў будуць пахаваныя ў тым раскопе, дзе мы іх знайшлі.


Мяркуючы па крыжах і надмагільных камянях, у Коматаве хаваліся праваслаўныя і грэка-каталікі (вуніяты), таму на сённяшняе пахаванне былі запрошаныя праваслаўны і грэка-каталіцкі святары.

Адслужыць паніхіду пагадзіўся а.Андрэй Крот.

 

Фота з месца раскопак Ірыны Мілінкевіч