Студыі “Макей” больш за 20 гадоў, на рынку яна з 1990 года. Пачыналася ўсе з некалькіх майстроў, зараз жа фірма налічвае больш за 200 чалавек у штаце. Увесь гэты час студыя працуе над якасцю, элегантнасцю і стылем.
“Працуюць у нас людзі з самай рознай адукацыяй, рознага ўзросту. Але ўсіх аб’ядноўвае любоў да сваёй справы”, – расказвае дызайнер Андрэй Ціцяк.
З дызайнераў, а дакладней з іх ідэй, усё і пачынаецца. Ідэя паступова ўвасабляецца ў шматлікія замалёўкі на паперы. Пасля абмеркавання і адбору лепшых момантаў, эскізы ператвараюцца ў падрабязны праект на камп’ютары.
Далей ідзе працэс стварэння макета ў матэрыяле. Праект аддаецца майстрам, і пасля набыцця неабходных матэрыялаў, пачынецца асноўная праца. У якасці аздаблення выкарыстоўваюцца шматлікія тэхнікі і матэрыялы: розныя віды адціску на скуры, фотадрук на скуры і палатне, каштоўныя і напаўкаштоўныя камяні, мастацкая коўка.
Далёка не заўсёды ўсё атрымліваецца з першай спробы. Адна мадэль можа перарабляцца шмат разоў, пакуль не выйдзе ў свет і не пачне радаваць пакупнікоў. “Шлях ад ідэі да мадэлі можа заняць тыдзень, а можа і паўгода”, – тлумачыць Андрэй.
Калі мадэль зацверджана галоўным дызайнерам і аддзелам маркетынгу, для яе робяцца ўсе неабходныя лякалы, як для майстроў, так і ў цэх “нарэзкі” скуры, каб сістэматызаваць і значна спрасціць працу. Толькі пасля гэтага мадэль ідзе ў тыраж.
Скуру ў “Макеі” выкарыстоўваюць пераважна айчынную: гарадзенскага і бабруйскага завода. Але ёсць і імпартная – напрыклад, італьянская.
Са скурай працуюць закройшчыцы і непасрэдна майстар. Менавіта ён робіць усё ад пачатку і да канца. На кожным вырабе ёсць этыкетка, на якой майстар ставіць свой нумар і подпіс.
З майстэрні вырабы адпраўляюцца на кантроль якасці, адтуль на склад, дзе ўжо размяркоўваюцца па фірмовых крамах, у тым ліку і ў інтэрнэт-краму.
