Веладарожак у горадзе толькі дзве, а на карце – больш за 20: чытаем карту веладарожак Гродзенскага аблвыканкама
Інтэрактыўная карта роварных дарожак і маршрутаў з’явілася ўлетку гэтага года і ахоплівае велаінфаструктуру ўсёй вобласці. Дадзеныя асобна збіраліся ў кожным райвыканкаме. Зялёным колерам пазначаныя веламаршруты, сінім – веладарожкі. Да прыкладу, клікнуўшы на пэўную вуліцу, можна даведацца кіламетраж веладарожкі і веламаршрутаў, наяўнасць разметкі і знакаў, тып дарожнага пакрыцця і ўбачыць фота абранага маршруту.
Інтэрактыўная мапа веламаршрутаў і веладарожак ствараецца на Гарадзеншчыне
Ідэя добрая, але калі б не важнае “але”: на карце няма размежавання паміж веладарожкай і разметкай на тратуары – і першае, і другое пазначана сінім колерам. На самай справе ў горадзе ўсяго дзве веладарожкі – у Пышках і мікрараёне Альшанка, а ўсё астатняе – гэта разметка на тратуары. Частка тратуара, аддзеленая белай лініяй, згодна ПДР не з’яўляецца веладарожкай.
Мы вырашылі даведацца, як ацэньвае новую карту прадстаўнік супольнасці гродзенскіх веласіпедыстаў – старшыня грамадскага аб’яднання «ВелаГродна» Юлія Каляда, і задалі некалькі наіўных пытанняў.
Ці патрэбна гродзенскім веласіпедыстам і турыстам анлайн-карта маршрутаў і веладарожак?
Вядома, анлайн-карта для веласіпедыстаў патрэбна. Але пытанне, для якіх і навошта? Калі трэба адлюстраваць інфаструктуру – гэта адна карта, для мясцовых веласіпедыстаў – іншая, для турыстаў – трэцяя. У чым розніца?
Напрыклад, турысту патрэбна карта на англійскай мове, мясцоваму не; турысту патрэбна інфармацыя аб недарагім начлезе і вячэры з велапаркоўкай, мясцоваму не. Калі гасцям горада патрэбен маршрут па гістарычных славутасцях, то мясцоваму веласіпедысту – маршрут з аднаго спальнага раёна ў іншы. Таксама мясцоваму веласіпедысту патрэбна магчымасць паказаць і расказаць, дзе інфраструктура адсутнічае або што дзе зламалася, а турыст наўрад ці будзе на гэта марнаваць час.
У любым выпадку анлайн-карты павінны быць не толькі інфарматыўнымі, але і інтэрактыўнымі – проста адлюстраваць інфармацыю на ёй мала. На добрым анлайн-рэсурсе павінны быць пласты, фільтры, магчымасць раварыстам зручна пракласці маршрут, зваротная сувязь. Мала зрабіць проста анлайн-карту: трэба пастаянна сачыць за зменамі ў горадзе і ўводзіць новыя дадзеныя. Інакш дарагі анлайн-рэсурс праз год можа страціць сваю актуальнасць.
На карце няма размежавання паміж веласіпеднай дарожкай і разметкай на тратуары. Наколькі гэта можа дэзінфармаваць веласіпедыстаў?
Гэта сапраўды важна, бо ў адрозненне ад веладарожкі на веларазметцы не дзейнічаюць ПДР, і веласіпедыст не мае перавагі руху па ёй. У адрозненне ад Еўропы ў Беларусі нельга рухацца па праезнай частцы. Убачыўшы паказаную “веладарожку” на карце, замежны турыст лагічна будзе перасоўвацца ў абраным кірунку па праезнай частцы. Праўда, за такую ”логіку” можна атрымаць штраф. Ды і шчыра: калі рухацца па веларазметцы, далёка не заедзеш: яна пастаянна перарываецца, у многіх месцах сцёрта, велапераездаў няма, па правілах яшчэ і на скрыжаваннях трэба спешвацца, то бок жаданне па ёй рухацца ў веласіпедыстаў знікае.
Названыя ўчасткі на мапе не з’яўляюцца веладарожкай (згодна з ПДР). Давайце зменім ім статус ці не будзем уводзіць людзей у зман.
Наколькі такая карта можа быць практычна карыснай?
Наколькі яна карысная, пакажа час. Пасля хуткага прагляду відаць, што карта рабілася больш для звядзення дадзеных. Няма ні англійскай, ні польскай моваў, няма зручнай кнопкі раздрукаваць, карты маленькага памеру, інфармацыя пра начлег дадзена ў выглядзе спісу без адзнак на карце, няма анлайн прывязкі да іншых карысных рэсурсаў і г.д.
У гэтым годзе ў аблвыканкаме праводзіліся сходы па пытаннях развіцця веларуху ў рэгіёне, але сябраў «ВелаГродна» туды не запрашалі. Усю інфармацыю ведаем з навінаў і пратаколаў у інтэрнэце. Чытаючы іх, у нас не раз склалася меркаванне, што пакуль сілы накіроўваюцца не на самыя важныя рэчы. Напрыклад, наяўнасць дадзенай карты не вырашыць праблем велаінфраструктуры, а іх хапае.
Горнік-джып або сіцібайк? Гарадзенскія велаэксперты раяць, як абраць ідэальны ровар
Пазіцыя “ВелаГродна” адназначная – пачынаць трэба з распрацоўкі канцэпцыі веларуху Гродна. Таксама варта зрабіць план на пару гадоў, каб разумець, якім мы хочам бачыць веларух у горадзе і вобласці да 2020 года, напрыклад. А пад гэтыя планы ўжо рабіць міжнародныя праекты і шукаць сродкі ў бюджэце.
Цяпер кожны жыве сам па сабе: мы збіраем інфармацыю аб праблемах, якія вырашаюцца не адразу, турыстычныя арганізацыі ствараюць веломаршруты, якія потым складана ўтрымліваць, дарожнікі будуюць высокія бардзюры, парушаючы нормы, горад малюе разметку, якая не мае статусу, ДАІ штрафуе нас за няспешванне на скрыжаваннях і г.д. Пакуль не будзе выразнага плана ўзаемадзеяння і разумення, куды мы ўсе разам павінны прыйсці, наўрад ці можна спадзявацца на тое, што Гродна стане веласіпеднай сталіцай Беларусі, а хацелася б.
Таццяна Лідзяева, намеснік начальніка ўпраўлення спорту і турызму Гродзенскага аблвыканкама:
– Мэта карты веларуху – сістэматызаваць веламаршруты і веладарожкі вобласці. Для веласіпедыста гэта будзе магчымасцю ацаніць свае сілы, бо адна справа ехаць па маршруце працягласцю трыццаць кіламетраў, іншая – праехаць пяць кіламетраў. Пры гэтым на карце пазначаны тып пакрыцця – жвіровае або асфальтавае, што таксама немалаважна.
Інфармацыя на карце веларуху будзе папаўняцца. Калі браць Ваўкавыскі раён, то ў гэтым рэгіёне зафіксаваны ўсе тры веламаршруты, у Свіслацкім раёне інфармацыя яшчэ ў стадыі збору. У бліжэйшых планах прамаркіраваць ўсе веламаршруты вобласці, такім чынам на месцах будуць выразна ведаць, на чыім балансе веламаршрут і хто адказвае за яго змест.
Паколькі паўнавартасных веладарожак у горадзе і райцэнтрах вельмі мала, на карце выдзеленая канструктыўная частка тратуара пазначаная таксама як веладарожка. Велааматараў становіцца ўсё больш, шмат хто будзе выкарыстоўваць карту ў працэсе планавання маршруту, таму не хацелася іх абмяжоўваць. У той жа час тая ж выдзеленая частка тратуара дае магчымасць веласіпедысту рухацца і паглядзець нейкія месцы.
У планах зрабіць папяровы варыянт карты, накладам 2500 асобнікаў на трох мовах – рускай, польскай і англійскай. Распаўсюджвацца карты будуць на выставах міжнароднай тэхнічнай дапамогі, якія традыцыйна праходзяць у Польшчы, Літве, Украіне, Беларусі. Зараз на сайце спорту і турызму аблвыканкама можна знайсці ўсе навіны і відэа пра развіццё веларуху ў вобласці. У перспектыве будуць арганізоўваць раз у месяц велапрабегі на пастаяннай аснове ва ўсіх райцэнтрах і ў Гродне. Дапамогу ў арганізацыі таксама будзе аказваць грамадскі савет па веларуху пры БРСМ, які быў створаны ў гэтым годзе.