Імпрэзы, прымеркаваныя да дня абароны дзяцей, у Гродне распачаліся 29 мая – са свята, што падрыхтаваў Тэатр лялек. Пакуль дзяці бавіліся з піратамі, рыхтавалі да марскога падарожжа папяровыя караблікі і глядзелі спектакль, “Твой стыль” пацікавіўся ў дарослых: ад чаго сёння трэба абараніць дзяцей і як гэта зрабіць найлепшым чынам?
Гарадзенскі дзіцячы садок №45 сёлета адзначае 45-годдзе і ў падыхтоўцы да ўгодкаў больш нагадвае будаўнічую пляцоўку – замест дзяцей тут зараз можна сустрэць толькі рабочых-будаўнікоў. Аднак гэта – таксама вынік педагагічнай дзейнасці. Рамонт, які ператварыў звычайны садок у пілотны аб’ект праекта “Энергаэфектыўнасць у школах”, што Еўразвяз і Праграма Развіцця ААН рэалізуюць у Беларусі, – узнагарода за плённую працу педагогаў у навучанні беражлівасці.
Гарадзенскія кавярні сталі неад’емнай і любімай часткай гарадской прасторы. Кожная з іх мае асобы падыход да сваіх кліентаў і вабіць духмянай кавай, гарачай гарбатай, смакоткамі ды інтэр’ерамі. Пытанне зараз не ў тым, што няма куды пайсці, бо гэту праблему вырашылі цягам апошніх гадоў. Пытанне – як выбраць добрае, асабліва, калі маеш абмежаваны час ды не можаш наведаць усе месцы. У выбары дапамагае сеціва, дзе гарадзенскія кавярні жывуць уласным віртуальным жыццём. Для тых, каму цікава паспрабаваць мегабайты кавы ці выказаць падзяку любімым установам, “Твой стыль” сабраў суполкі папулярных кавярняў Гродна.
З нагоды 140-гадовага юбілея “Лідскае піва” аднавіла не толькі даўні рэцэпт напою, але і замовіла для яго разліву адмысловую бутэльку. Яе вырабілі па ўзору знакамітай сёння ў калекцыянераў бутэлькі Нозеля Пупко – заснавальніка лідскага бровара. Пра сучасныя тэхналогіі выпуску шклатары і асаблівасці працы з гістарычнай рэплікай “Твайму стылю” расказалі на Гродзенскім шклозаводзе.
Адзіная ў горадзе закусачная з назвай “Чабурэчная” на працягу чвэрці стагоддзя прапануе гарадзенцам і гасцям горада фірмовую страву – “чабурэкі па-гарадзенску”. За 25 гадоў змянілася многае навокал установы, ды й сама яна перажыла пэўныя змены. Аднак рэцэпт брэндавай стравы захаваўся нязменным. Аб тэхналогіі прыгатавання фірмовых чабурэкаў расказала “Твайму стылю” Ірына Равінская, загадчыца вытворчасці “Чабурэчнай”, а паказала, як яны гатуюцца, повар Аляксандра Мазюк.
Шэдэўр ад гарадзенскіх культурніцкіх дзеячоў 20 мая пайшоў гуляць па сеціве і несці культуру ў масы. Паабураўшыся спачатку, інтэрнаўты сталі ва ўвесь голас смяяцца. Бо што яшчэ застаецца жыхару культурнай сталіцы, перажыўшаму культурны шок у год культуры? Пасмяемся разам з хвалі гарадзенскага гумару, што паўстала ў адказ на чыноўніцкі крэатыў.
Ноч музеяў, якую для гарадзенцаў зладзіў Музей гісторыі рэлігіі, прапанавала багатую праграму са шпацырам па горадзе і наведваннем адразу трох музеяў. Наведвальнікаў гасцінна прымалі ў турме, запрасілі пазнаёміцца з прывідамі пажарнай каланчы і пазнаёмілі з метадамі працы сярэднявечнай інквізіцыі. Разняволіцца пасля жахаў дазволіў спектакль Тэатра лялек і кава са слодычамі. Скончылася ноч канцэртам арганнай музыкі ў Фарным касцёле.
“Я учора сніў сваё падарожжа на Сатурн, раней на Месяц, ці яшчэ куды. Паўсюль на гэтых планетах жывуць людзі. І ўсе яны – выключна беларусы”. Гэтыя развагі “беларускага Цыялкоўскага”, Язэпа Драздовіча, узгадаў у размове пра новую кнігу Алесь Госцеў, аўтар манаграфіі “Вядомыя ўраджэнцы Гродзенскай вобласці”, другой кнігі з серыі пра знакамітых гарадзенцаў.
Госцяй на курсах “Мова нанова” ў Гродне 16 мая стала Марыя Міцкевіч – унучка адразу двух класікаў беларускай літаратуры. Яна распавяла пра сваіх дзядоў, а гарадзенскія навучэнцы прадставілі ў адказ імправізаваныя спектаклі з ўрыўкаў твораў Якуба Коласа і Янкі Маўра. У “эксклюзіўнай” частцы сустрэчы Марыя Міцкевіч адказала на пытанні пра сямейны побыт пісьменнікаў і расказала некалькі смешных жыццёвых выпадкаў з іх удзелам.
Другая тэатральная гасцёўня, што адбылася 12 мая, прайшла з невялікай колькасцю гледачоў, але ў вельмі цёплай атмасферы. Пасля прагляду трох міні-спектакляў гарадзенцы яшчэ больш за гадзіну размаўлялі з госцем імпрэзы рэжысёрам Міхаілам Лашыцкім. Як зазначыў Аляксандр Цебянькоў, адзін з арганізатараў мерапрыемства, гэтым разам гасцёўня насамрэч сабрала сапраўдных аматараў і сябраў тэатра.
