Пад Новы год добра прынесці ў дом сімвал святаў – елку. “Твой стыль” трымаецца традыцый і публікуе матэрыял пра навагодняе дрэва. У якасці эксперта па елках да збору цікавых фактаў далучыўся Аляксей Гарохаў, начальнік аддзела лясной гаспадаркі і лесааднаўлення Гродзенскага лясгаса.
Настольная гульня “Мова”, сумесны праект аўтараў “Паўстанцаў” і курсаў “Мова нанова”, ужо надрукавана і 30 снежня паступіла ў крамы. Паводле аўтараў, яна мае шанец стаць вельмі запатрабаванай для беларусаў, бо дазваляе ў працэсе гульні пачаць размаўляць па-беларуску і ўдасканаліць моўныя навыкі. Пра папулярнасць новай гульні сведчыць і дастатковая колькасць ахвотных, што падтрымалі праект рублём: грошы на выданне гульні збіралі талакой.
Ад 29 снежня працуюць снегавыя пушкі на спусках горналыжнай трасы “Алімп” каля вёскі Каробчыцы – з паніжэннем тэмпературы тут пачалі заснежванне схілаў. Калі надвор’е і надалей будзе спрыяць, то ўжо з першых выходных Новага года, 2 студзеня, траса прыме наведвальнікаў.
Сёлета прагляды фільмаў-пераможцаў кінафестывалю Bulbamoviе ладзілі не толькі ў Польшчы і Мінску, але і ў рэгіёнах Беларусі. Іх паглядзелі ў Бабруйску, Магілёве, Брэсце, Гомелі, Віцебску і Маладзечне. У Гродне фестывальны паказ адбыўся 27 снежня. Ад імя журы і беларускіх арганізатараў прадстаўляў кінапраграму культуролаг і кінакрытык Максім Жбанкоў. Ён падзяліўся з “Тваім стылем” сваімі меркаваннямі наконт фестывалю, сучаснага беларускага кіно, яго аўтараў, гледачоў, будучых лёсаў і перспектыў.
У гарадзенскім заапарку зладзілі навагодняе свята з удзелам сімвалаў года, што сыходзіць і таго, што настае. 27 снежня дзеці і бацькі весела пабавілі час з аніматарамі-снегавікамі, выкрывалі хітрыкі бабы-Ягі і сустракаліся з жывёламі: кармілі на развітанне козачку і частавалі адмысловым “торцікам” малпаў.
Жыццё Беларусі на цывілізацыйным разломе паміж Усходам і Захадам, развіццё асобы і магчымасць сумеснай творчасці як спосабу развіцця грамадства – гэта ідэі, актуальныя не толькі тут і цяпер. Амаль сто гадоў таму гэтыя пытанні турбавалі беларускага філосафа Ігната Абдзіраловіча. Яго знакамітае эсэ “Адвечным шляхам” аналізаваў 17 снежня ў час лекцыі ў галерэі “Крыга” філосаф Павел Баркоўскі.
Святочны канцэрт этна-гурта Vuraj адбыўся 25 снежня ў рэстаране “Тапаз”. Музыкі прыехалі павіншаваць гарадзенцаў з Калядамі, прэзентаваць новы міні-альбом “Шэсць загадок” і адзначыць свой пяцігадовы юбілей.
Сёлета на Каляды, 25 снежня, у небе над Гродна можна было пабачыць поўню. Супадзенне поўнага Месяца з Раством Хрыстовым з’ява даволі рэдкая. Паводле паведамлення NASA, апошні раз падобнае назіралі ў 1977 годзе, паўтарэнне адбудзецца толькі ў 2034. Да таго ж, калядная поўня бягучага, 2015 года, падпадае пад азначэнне “халоднай” – так астраномы называюць апошнюю поўню года, бо назіраюць яе ў пачатку зімы.
Прэзентацыя гістарычнага гарадзенскага календара ад Віктара Саяпіна адбылася 23 снежня ў Абласной навуковай бібліятэцы імя Карскага. Наведвальнікі імпрэзы маглі ўпэўніцца, што з дапамогай календара кожны дзень можна даведвацца пра цікавыя і часам нечаканыя факты з гісторыі горада. Каманда, што працавала над календаром, расказала пра гісторыю яго стварэння і далейшыя планы.
Раннія прыцемкі і адсутнасць снегу напярэдадні навагодніх святаў ствараюць усе ўмовы для вечаровых шпацыраў па Гродне. Па-першае – не холадна, па другое – цемра хавае адсутнасць снегу. Галоўнае ж – святочная ілюмінацыя сцвярджае, што, нягледзячы ні на што, святы набліжаюцца.
Вызначыцца з маршрутам вечаровага шпацыру і навагодніх фотасесій можна, паглядзеўшы нашу навагодне-светлавую фотападборку.
