Трэці тур чэмпіянату для гарадзенскага “Нёмана” зноў заканчваецца няўдала. Каманда Сяргея Саладоўнікава, стварыўшы адзін момант у матчы, здолела ў гульні з “Віцебскам” зарабіць толькі адно ачко. Кіраўніцтва горада незадаволена гульнёй мясцовай каманды і прапануе трэнеру сысці самастойна.
У Гродне да 2017 года больш за 2 тыс. смеццеправодаў у амаль 700 шматкватэрных дамах будуць закрытыя, паведаміў Белта генеральны дырэктар Гродзенскай гарадской ЖКГ Алег Дабравольскі. У 2015 годзе было закрыта каля 100 смеццеправодаў. Бытавыя адходы гараджанам прапануюць выносіць на спецыяльныя кантэйнерныя пляцоўкі.
Дзякуючы супольнаму праекту Саюза беларускіх пісьменнікаў і Электроннай кнігарні kniharnia.by выданні “Замова ад страху” і “У віры быцця” Народнага паэта Беларусі Ніла Сымонавіча Гілевіча цяпер ёсць у многіх фарматах. Фрагменты кніг у фармаце .epub можна спампаваць бясплатна на lit-bel.org, цалкам зборнікі даступныя за сімвалічны кошт на kniharnia.by ва ўсіх папулярных фарматах для электронных прылад. Пра гэта паведамілі ў прэс-службе Саюза беларускіх пісьменнікаў.
Адукацыйны праект «Чытаем па-беларуску з velcom», які з поспехам прайшоў у мінскіх школах, будзе працягнуты ў рэгіёнах Беларусі. Асветніцкая ініцыятыва па папулярызацыі беларускай мовы і літаратуры ахопіць 25 школ у кожнай вобласці краіны. Першыя рэгіянальныя ўрокі для малодшых школьнікаў будуць арганізаваны ў красавіку і траўні 2016 года ў Гомелі, Брагіне, Рэчыцы, Светлагорску, Мазыры і Жлобіне. А напачатку новага навучальнага года каманда праекта «Чытаем па-беларуску з velcom», у якую ўвайшлі вядомыя беларускія пісьменнікі і паэты, прыедзе з захапляльнымі заняткамі ў школы Брэста і Брэсцкай вобласці.
У Гродне з 15 па 17 красавіка праходзіць Чэмпіянат вобласці па турысцка-прыкладным шматбор’і ў тэхніцы горна-пешаходнага турызму, а таксама этап сусветнага рэйтынгу па спартыўным арыентаванні. У спаборніцтвах прымае ўдзел больш за 700 чалавек.
Гродзенская мастачка, якая мінулай восенню атрымала прэмію Тэйлара ў Парыжы, не любіць расказваць пра свае працы. Яна лічыць, што іх трэба бачыць. Гарадзенцы могуць пабачыць выставу Валянціны Шобы “СИМВОличное” ў галерэі “Тызенгаўз” з 14 да 25 красавіка.
Паездка ў Маскву для 25-гадовага Паўла павінна была стаць ажыццяўленнем запаветнай мары. Менавіта там гарадзенец спадзяваўся сустрэцца са сваім кумірам. Але, прыехаўшы ў офіс зоркі, Павел быў вымушаны падарыць шампанскае не Цімаці, а яго ахове.
Гарадзенскі абласны суд 15 красавіка вынес прысуд па рэзананснай справе аб забойстве падлеткам свайго пяцігадовага брата, перадае БЕЛТА. 17-гадовы малады чалавек прысуджаны да 15 гадоў пазбаўлення волі. Ён прызнаны вінаватым у забойстве пяцігадовага брата, замаху на забойства маці, а таксама ў падпале кватэры.
У канцы красавіка “Гроднааблкінавідэапракат” плануе адкрыць у горадзе чатыры пункты велапраката. Тры з іх з’явяцца каля кінатэатраў “Усход”, “Космас” і “Кастрычнік”, чацвёрты, з-за недахопу месца каля “Чырвонай зоркі”, размесціцца каля Моладзевага цэнтра “Гродна”.
Гарадзенец Іван Петушок, заснавальнік тайм-кафэ “Партал”, патрапіў у фінал конкурса “Горад”, удзельнікі якога намагаюцца палепшыць свае гарады. На мінулым тыдні Іван удзельнічаў у трэнінгу ў Мінску, а зараз будзе рэалізоўваць хатняе заданне, у якім жыхары Гродна могуць яму дапамагчы.
