Ноччу 10 сакавіка на неахоўваемай стаянцы па вуліцы Гастэла ў Карэлічах невядомыя разбілі шкло ў мікрааўтобусе Volkswagen Transporter. Уласнік аўтамабіля – фірма з Гродзенскага раёна – лічыць, што гэта праява “вайны маршрутчыкаў”. Карэліцкі раённы аддзел Следчага камітэту ўзбудзіў крымінальную справу па факту хуліганства (ч.1 арт. 339 КК).
Беларуская чыгунка прызначыла дадатковыя цягнікі ў міжнародных зносінах. Так, дадатковыя цягнікі № 50/49 Брэст-Пецярбург, № 78/77 Гродна-Масква, № 132/131 Брэст-Масква будуць курсіраваць штодня ў перыяд з 21 сакавіка да 4 красавіка, паведамілі ў прэс-цэнтры БЧ.
У нядзелю, 20 сакавіка, адбудзецца супольная сустрэча “Tandem Evevnings in Hrodna meets Couchsurfers”.
Дзяцей ад трох гадоў разам з дарослымі запрашае далучыцца да Гадзіны Зямлі (Earth Hour) Дзіцячая экастудыя. Імпрэза адбудзецца 19 сакавіка па адрасу Ціміразева, 37. Пад час імпрэзы дзеці разам з дарослымі зробяць кантэйнеры для скарыстаных батарэек і садовыя ліхтарыкі, даведаюцца пра экалагічныя праблемы і пра тое, што кожны з нас можа зрабіць для захавання рэсурсаў планеты.
Да чарговай гадавіны з дня заснавання гарадзенскага палка АМАП прэс-служба УУС Гродзенскага аблвыканкама падрыхтавала ролік-нарэзку відэа ў якім міліцыянты спускаюцца з даху і пралазяць праз вокны ў кватэры, а таксама затрымліваюць злачынцаў на трасе М6.
Польскі міністр замежных справаў Вітальд Вашчыкоўскі падчас свайго візіту ў Беларусь, які адбудзецца 21-22 сакавіка, мае наведаць горад сваіх продкаў паводле матчынай лініі – Ваўкавыск.
Больш за 60 млрд рублёў накіруюць на рамонт аб’ектаў і добраўпарадкаванне Воранава да абласных “Дажынак” 2016 года ў Гродзенскай вобласці, паведамілі карэспандэнту БЕЛТА ў камітэце па сельскай гаспадарцы і харчаванню Гродзенскага аблвыканкама.
16 сакавіка у 17.00 лекары, анкапацыенты і грамадскія актывісты Гродна арганізуюць сустрэчу для ўсіх, хто зацікаўлены вызначыць для сябе новую жыццёвую стратэгію пасля пастаноўкі дыягназу “рак”, а таксама падзяліцца асабістым досведам паспяховага выздараўлення.
На працягу тыдня аператыўнікі шукалі 56-гадовага жыхара вёскі Пяцюлеўчы Лідкага раёна, што 7 сакавіка сышоў з дому і не вярнуўся. 15 сакавіка ва УСС Гродна паведамілі, што яго цела з шасцю сечанымі ранамі было знойдзена ў канаве з вадой.
Дзяўчынка ва ўзросце аднаго году патрапіла 14 сакавіка ў абласную дзіцячую бальніцу Гродна з дыягназам “атручванне ўгарным газам”, паведамілі ў прэс-службе МНС.
