У верасні 2016 года ў Мінску, Брэсце, Віцебску і Гродне пачнуць працаваць стартап-школы, дзе кожны зможа паспрабаваць запусціць уласны бізнес, паведамілі БЕЛТА ў грамадскім аб’яднанні “Таварыства садзейнічання інавацыйнаму бізнесу”. Тры школы адкрыюцца ў абласных гарадах, і тры – у Мінску. Абласныя школы будуць арыентаваныя на запуск розных відаў бізнесу, сталічныя – на вытворчыя і навуковыя праекты, а таксама студэнцкія праекты БДТУ.
У польскім Вроцлаве 17 верасня адбудзецца сумесны канцэрт “Brutto & Ляпіс” c гродзенскай групай Dzieciuki. “Камсамолка” вырашыла даведацца, у чым сакрэт рокерскага сяброўства ў лідара гурта Dzieciuki Аляксандра Дзянісава.
Магчымасць узяць медалі прадстаўнікам Гарадзеншчыны на Алімпіядзе ў Рыа стала цалкам рэальнай, калі 17 жніўня два беларускія малатабойцы Іван Ціхан і Сяргей Каламоец выйшлі ў фінал.
У рамках аўдыёпраекта “Краязнаўчая казка”, які ладзіць штотыдневік “Аргументы і факты” пры падтрымцы кампаніі velcom, лідар этна-трыа “Троіца” Іван Кірчук агучыў краязнаўчую казку пра ўзнікненне горада Гродна. Яе можна праслухаць або спампаваць на сайце kazka.aif.by. Гэта сёмая казка з тых дзесяці, што спецыяльна для праекта агучылі знакамітыя асобы Беларусі, паведамілі ў прэс-службе кампаніі velcom.
Гарадзенская фатограф Наталля Бакей прадставіла адукацыйную фотасесію, у якой былыя жыхары пункта часовага ўтрымання бяздомных жывёл паўсталі ў ролі мадэляў. Тэма праекта – папулярныя англійскія ідыёмы, дзе згадваюцца сабакі.
Самавылучэнец з Гродна Максім Штэйнвальд вырашыў пайсці ў дэпутаты. Акруговая камісія адмовіла яму ў рэгістрацыі кандыдатам, таму што сярод яго дакументаў знайшла копію працоўнай кніжкі, не завераную пячаткай працадаўцы. Штэйнвальд разам з адвакатам дайшоў да суду, даказваючы, што закон не патрабуе завяраць копіі такіх дакументаў. Да таго ж у самога акруговага выбаркама не ўзнікла прэтэнзій да іншых дакументаў вылучэнца, якія не былі завераныя, піша TUT.BY.
Доля асоб у непрацаздольным узросце вырасла ў Беларусі за апошнія гады да 24,8%. Пры гэтым моладзе (узрост менш за 16 гадоў) зараз толькі 18,9%. “Наша ніва” прыводзіць топ-7 самых “старых” раёнаў краіны. Больш паловы з іх – Гарадзеншчына. Сярод раёнаў, дзе моладзі больш за сталых людзей, гарадзенскіх не аказалася.
Гарадзенскія “Варвары” 20 жніўня правядуць у Калінінградзе свой апошні матч рэгулярнага сезону ва Усходняй лізе амерыканскага футбола. Паколькі аўтобус на выезд напалову вольны, каманда прапануе гарадзенцам з’ездзіць і падтрымаць іх у матчы з “Бурштынавымi ястрабамi”. А таксама пабываць на Балтыцы на зваротным шляху.
Таксіста Андрэя Этэля (на фота), якога забілі ў ноч з 13 на 14 жніўня каля Гродна, пахавалі 17 жніўня. На развітанне з ім прыйшлі сотні людзей. Акрамя сваякоў і знаёмых, былі звычайныя гарадзенцы ды калегі. Падазраваныя, якія забілі чалавека за 600 тыс. рублёў, тым часам прызналіся ў злачынстве і кажуць, што раскайваюцца.
Пажар у дзевяціпавярховым інтэрнаце на бульвары Ленінскага камсамолу здарыўся раніцай 16 жніўня. Загарэлася пасцель у блоку на шостым паверсе, паведамілі ў прэс-службе МНС.
